Shveytsariyada musulmon o‘quvchilarga ustozi bilan qo‘l berib so‘rashmagani uchun jarima solinadi

Shvyyetsariyaning Bazel-Land kantonida musulmon maktab o‘quvchilariga o‘z ustozlari bilan qo‘l uzatib so‘rashish majburiyatini qo‘yishdi. Bu haqida The Local nashri xabar berdi.

Majburiyat bajarilmagan taqdirda maktab o‘quvchilarining ota-onalari 5 ming frank miqdorida jarima to‘lashadi. 

Ikki oy avval maktab o‘quvchilari ustozi begona ayol kishi bo‘lganligi uchun u bilan so‘rashishdan bosh tortishgan va oila a'zosi bo‘lmagan kishi bilan ko‘rishish ularning diniga to‘g‘ri kelmasligini aytishgan. Mazkur voqeadan so‘ng maktab nizomiga o‘zgartirish kiritilgan. 

Bu voqea jamiyat o‘rtasida noroziliklarni keltirib chiqardi, chunki Shveytsariyada bolalarni yoshlik chog‘idanoq hurmat belgisi sifatida qo‘l uzatib so‘rashishga o‘rgatishadi. Maktab o‘quvchilarning hatti-harakati jinsiy kamsitish va mamlakat madaniyatini haqorat etish sifatida tushunildi. 

Ta'lim va madaniyat bo‘limining rasmiy e'lonida aytilishicha, jamiyatda jinsiy tenglikka qiziqish va xorijliklarni integratsiya qilish masalalari o‘quvchilarning diniy erkinligidan muhimroq hisoblanadi.