Iroq harbiylari IShID shaharlaridan biri Falujani qurshab oldi

IShIDning Falujadagi bazalari qurshab olindi, deb xabar qilgan Iroq generali Hamid al-Malikiy mamlakat mudofaa vazirligi tarqatgan videolavhada. 

Iroq armiyasi, mamlakat va koalitsiya harbiy havo kuchlarining ko‘magi bilan Iroqning Faluja shahrini terrorchilardan ozod etish amaliyotini boshlagan. Iroqlik harbiylar 30 may kuni Falujaning bir qancha chekka qishloqlarida nazoratni o‘z qo‘llariga olishgan. 

Iroq harbiylari oldidagi galdagi vazifa esa, shaharning markazigacha kirib borish va jangarilarni siqib chiqarishdan iboratdir. Ammo bu harbiy amaliyotning eng xavfli bosqichi hamdir, deb xabar qilmoqda SNN telekanali. 

Al-Malikiyning aytishicha, mazkur jangovar harakatlarda havo kuchlarining yordami beqiyosdir. Ular IShID jangchilarini boshpanalaridan chiqarib, qurol-yarog‘larini vayron qilmoqda. 

BMT qochoqlar masalalari bo‘yicha agentligi, Iroqning Faluja shahrida jangovar harakatlar keskinlashayotgan hamda jangarilar egallab turgan hududlarni bombardimon qilish kuchayib borayotgan bir vaqtda, 50 mingga yaqin tinch aholi vakilining hayoti xavf ostida ekanidan ogohlantirmoqda.
 
Xabarlarga ko‘ra, jangarilar tomonida urushishdan bosh tortayotgan falujalik o‘smirlar va erkak kishilarni qatl qilish hollari tobora ko‘payib boryapti. Yuzlab ayollar va bolalar esa, vatanlarini tashlab qochishga majbur bo‘lishmoqda. 

Xususan, xavfsizlik kuchlari, 760 nafarga yaqin kishini Faluja sharqiy va janubi-sharqiy hududlarida qutqargan. Bundan tashqari, shaharda oziq-ovqat tanqisligi tobora kuchaymoqda. U yerda asosan yegulik sifatida xurmolardan foydalanilmoqda.