Xitoylik investorlar iyun oyi oxirigacha «Inter»ning 70 foiz aksiyasini sotib oladi

«Inter» jamoasi xo‘jayini Erik Tohir klub aksiyalarining nazorat paketini yaqin vaqt ichida osiyolik investorlarga sotadi.

Avvalroq Xitoyning Suning Group konglomerati milanliklarning 20 foiz aksiyasini sotib olishi haqida xabar berilgan edi, biroq so‘nggi ma'lumotlarga ko‘ra, xitoyliklar 70 foiz aksiyani sotib oladi.

Taxminlarga ko‘ra, savdo iyun oyi oxirigacha amalga oshadi. Ma'lumot uchun, Suning Group Xitoy Superligasida ishtirok etuvchi «Tszyansu Sunin» klubiga egalik qiladi.

Suning Commerce Group elektr anjomlari ishlab chiqarish va sotish bilan shug‘ullanadi. Xitoy, Hongkong va Yaponiyada 1600dan oshiq do‘koni bor. Yillik tovar aylanmasi 400 mlrd dollarni tashkil qiladi.

«Inter»ning yangi xo‘jayini bo‘lishi kutilayotgan Chjan Jindon Xitoyning eng boy odamlari ro‘yxatida 28-o‘rinda turadi, u XXR hukumati a'zosi hisoblanadi.

Ma'lumot uchun, «Inter»ning 30 foiz aksiyasi Massimo Morattiga tegishli. Tohir esa o‘zining 70 foizlik aksiyasining 40 foizini sotishi mumkin. Jamoa sotilgan taqdirda ham Erik Tohir klub prezidenti sifatida faoliyatini davom ettiradi.