O‘zbekistonning Rossiyadagi elchisi golf bo‘yicha xayriya turnirida eng yaxshi golfchi bo‘ldi

O‘zbekistonning Rossiyadagi elchisi Bahrom Ashrafxonov Xalqaro bolalarni himoya qilish kuniga bag‘ishlanib o‘tkazilgan 21-xayriya turnirida ishtirok etib, "eng yaxshi golf o‘ynovchi elchi" sifatida tan olindi. Bu haqda "Interfaks" agentligi xabar tarqatgan.

Diplomatik korpus uchun xizmat bosh boshqarmasining Moskva shahri yaqinida joylashgan filiali maydonida o‘tkazilgan turnirda xayriya mablag‘lari yig‘ilgan. Keyingi 20 yil davomida bunday sport marosimlari orqali 80 million rubldan ortiq xayriya mablag‘i bolalar uchun yo‘naltirilgan. Shuningdek, turnir golf sportini ommalashtirishga xizmat qiladi.

Rossiya olimpiya qo‘mitasi prezidenti Aleksandr Jukov va Rossiya golf assotsiatsiyasi rahbari Boris Xristenko yig‘ilganlarga o‘z nutqlari bilan murojaat qilishgan.

Joriy yilda diplomatik korpus nomidan Avstraliya, Vetnam, Malayziya, Kot-D-Ivuar, Laos elchixonalari diplomatlari qatnashdi.

Bahrom Ashrafxonov O‘zbekistonning Rossiyadagi elchisi etib tayinlangani 2016 yil fevralida ma'lum bo‘lgan edi. U bungacha Moliya vaziri o‘rinbosari – O‘zbekiston Respublikasi Moliya vazirligi G‘aznachiligi boshlig‘i lavozimida ishlagan.