«Barselona»: Dani Alves ketishga qaror qildi, Neymar va Maskerano esa qoladi

«Barselona» jamoasi sport direktori Robert Fernandes yaqin vaqt ichida Dani Alves jamoani tark etishi haqida rasman ma'lum qildi. U shuningdek, turli jamoalardan qiziqishlar mavjudligiga qaramasdan Neymar va Haver Maskerano jamoada qolishini ma'lum qildi.

«Dani Alves „Barselona“dan ketishga qaror qildi. Bu uning shaxsiy qarori va biz buni hurmat qilamiz. Neymar bizning jamoamizda o‘ynashda davom etadi. U uzoq vaqt davomida jamoada qoladi. Men Maskeranoning qolishiga ham shubha qilmayman. U jamoaning muhim futbolchilaridan biri. Denis Suaresmi? «Vilyarreal»ga biz uni ortga qaytarishga qaror qilganimiz haqida ma'lum etganmiz. Bizda yuqori saviyali ikki davrozabon, Bravo va ter Shtegen bor. Ularning ikkisi ham jamoada qoladi va bundan juda xursandman», — deya Fernandesning so‘zlarini keltiradi «Barselona» jamoasi matbuot xizmati.

Alvesni o‘z safiga qo‘shib olish uchun asosiy da'vogar «Yuventus» hisoblanadi. 33 yoshli futbolchi turinliklar jamoasiga erkin agent maqomida o‘tishi kutilmoqda.

Bundan tashqari, braziliyalik futbolchiga «PSJ» va «Manchester Yunayted» tomonidan ham qiziqish mavjud.

Alves «Barselona»ga «Sevilya»dan 2008 yili o‘tgandi. U o‘tgan vaqt ichida jamoa bilan 3 marta YeChL g‘olibi bo‘ldi, 6 marta Ispaniya chempioniga aylandi, 4 martadan mamlakat Kubogi va Superkubogini oldi hamda 3 marta klublar o‘rtasidagi jahon chempionatida g‘olib chiqdi.

Joriy mavsumda u kataloniyaliklar jamoasi safida 48 uchrashuv o‘tkazib, 1 gol urdi va 8ta golli pas muallifi bo‘ldi.