Niderlandiyada O‘zbekistonning iqtisodiy salohiyati namoyish qilindi

Niderlandiyada O‘zbekiston Respublikasining iqtisodiy va investitsion salohiyatiga bag‘ishlangan axborot seminari bo‘lib o‘tdi.

Tadbir YeIning "Menejment ta'lim dasturi - O‘zbekistondagi kichik biznes va xususiy tadbirkorlik korxonalari rahbarlarining salohiyatini rivojlantirish" loyihasi doirasida O‘zbekistonning Belgiyadagi elchixonasi tomonidan O‘zbekiston sanoat palatasi va Niderlandiya parrandachilik markazi bilan hamkorlikda  tashkil etildi.

Tadbirda niderland kompaniyalarining 50 nafar vakili ishtirok etdi. O‘zbekistondan - "O‘zparrandasanoat", "O‘zsanoatqurilishbank" va "Xalq banki", parrandachilik sohasida faoliyat yurituvchi korxonalar assotsiatsiyasi anjuman ishtirokchilari bo‘ldi.

Ishtirokchilar mamlakatning mustaqillik yillaridagi ijtimoiy-iqtisodiy taraqqiyoti, O‘zbekistondagi farovon biznes-iqlimning asosiy omillari, soliq imtiyozlari, bojxona preferensiyalari, maxsus iqtisodiy zonalar, qishloq xo‘jaligi va oziq-ovqat sanoatida o‘tkazilayotgan islohotlar, shuningdek mamlakatda oziq-ovqat xavfsizligini ta'minlashga doir ma'lumotlar bilan batafsil tanishib chiqishdi. 

Tadbir davomidaTrade Uzbekistan elektron savdo maydonining imkoniyatlari namoyish etildi. 

Tadbirning axborot bilan tanishuv qismidan so‘ng ikki mamlakatning biznes doiralari muzokaralar o‘tkazishdi. Ikki tomon oziq-ovqat sanoati va parrandachilikning turli yo‘nalishlarida hamkorlik qilishga kelishib olishdi.