Turkiya bosh vaziri bir kunlik rasmiy tashrif bilan Ozarbayjonga keladi

Turkiya hukumati rahbari Binali Yildirim, 3 iyun kuni Ozarbayjonga rasmiy tashrif buyuradi. Diplomatik manbalarga ko‘ra, turk bosh vaziri prezident Ilhom Aliyev va hamkasbi Artur Rasizade bilan uchrashadi.

Aytish joizki, bu Yildirimning bosh vazir lavozimidagi ikkinchi xorijiy safaridir. U 1 iyun kuni Shimoliy Kipr Turk respublikasiga borgan edi. 

Turkiya bosh vaziri Ozarbayjon rahbariyati bilan ikki tomonlama aloqalarning barcha sohalarini muhokama etadi, unda asosiy e'tibor, ikki mamlakat ishtirokida energetika va transport sohalarida amalga oshirilayotgan loyihalarga qaratiladi. 

Xususan, 9,3 mlrd dollarlik Transanado‘li gaz quvuri muhim mavzulardan biri bo‘ladi. U, ozarbayjon tabiiy gazini Yevropa janubiga yetkazishni ko‘zda tutadi. Rejaga muvofiq, ushbu quvur 2018 yildan Turkiyaga gaz yetkazib berishni boshlaydi. 2020 yilda, Transadriatika gaz quvuri qurib bitkazilishi bilan, Italiyaga yetkaziladi. 

Tomonlar shuningdek, Turkiya hududi orqali o‘tuvchi Baku - Tbilisi - Kars temiryo‘li qurilishini ham muhokama etishadi. 

Shu bilan birga, ikki mamlakat o‘rtasidagi savdo aloqalarini yanada faollashtirish, o‘zaro sarmoya almashish hajmini ham oshirish masalalari ham ko‘rib chiqiladi. 

Muzokaralar chog‘ida, tomonlarni qiziqtirgan xalqaro mavzular bo‘yicha fikr almashiladi.