Turkiyada sayyohlarni jalb etish maqsadida samolyotni dengizga g‘arq qilishdi

Turkiya hukumati Egey dengiziga, Kushadasi kurorti qirg‘oqlari yaqiniga Airbus A300 samolyotini cho‘ktirishga qaror qildi. Bu orqali kurortda dayvingni rivojlantirish va sayyohlar oqimini oshirish ko‘zda tutilgan.

54 metr uzunlikdagi, eni qanotlari bilan 44 metrni tashkil qiladigan samolyot mamlakatdagi eng yirik sun'iy rif bo‘ldi. Daily Sabah ma'lumotiga ko‘ra, uni 93 ming dollar evaziga xarid qilishgan.

"Biz bu loyiha orqali har yili kurortga 250 ming sayyoh kelishiga erishishni rejalashtirganmiz. Bu loyiha orqali Kushadasi yozgi mavsumni zararsiz yakunlashi mumkin", deydi shahar meri Oydin O‘zdem Cherchio‘g‘li.

Qayd etilishicha, A300 samolyotini sayyohlar e'tiborini tortish maqsadida avval ham suvga joylashtirishgan. Kichikroq samolyotlar Antalya viloyatining Kash va Kemer kurortlari yaqinida suvga g‘aqr qilingandi.

Turkiya Madaniyat va turizm vazirligi ma'lumotiga ko‘ra, aprel oyida mamlakatga 1,75 mln xorijlik sayyoh tashrif buyurgan. Bu esa o‘tgan yilning shu davriga nisbatan 28 foizga kam. Rossiyadan keluvchi sayyohlar oqimi keskin kamaygan - 79 foiz (150 ming nafardan 31 minggacha). Bunga Suriya osmonida Rossiya samolyoti turkiyalik uchuvchi tomonidan urib tushirilishi sabab bo‘lgan. Shuningdek, Turkiyadagi teraktlar tufayli Yevropadan sayyohlar kelishi kamaygan.