RF va Qirg‘iziston hukumat rahbarlari Dmitriy Medvedev va Sooronboy Jeenbekovlar o‘rtasidagi muzokaralar natijasi o‘laroq, ikki mamlakat o‘rtasida neft va neft mahsulotlari yetkazib berishga oid bitim imzolandi.
Unga ko‘ra, Rossiya Qirg‘iziston ichki ehtiyoji uchun eksport qilayotgan neft va neft mahsulotlaridan eksport solig‘ini olmaydi. Soliqsiz mahsulotlar hajmi esa, 31 dekabrgacha bo‘lgan muddatda aniqlab olinadi.
Mazkur bitim imtiyozli neft mahsulotlari qayta eksport qilinishini taqiqlaydi. Mabodo, shunday holat qayd etilgudek bo‘lsa hamda 2 oy muddat ichida o‘zaro kelishuvlarga erishilmasa, Rossiya tomoni soliqsiz yetkazib berishlarga chek qo‘ya oladi. Bu qoida, asli Rossiyada ishlab chiqarilgan va Yevroosiyo iqtisodiy ittifoqining boshqa a'zolaridan olib kirilgan neft mahsulotlariga ham tegishlidir.
Rossiya Qirg‘iziston yoqilg‘i-moylash mahsulotlarining 90 foizini yetkazib beradi. Mamlakat bir yilda 1 mln tonna neft mahsuloti iste'mol qiladi.