O‘zbekiston MTJ o‘rtoqlik uchrashuvida Kanadaga mag‘lub bo‘ldi (Video)

JCh-2018 3-saralash bosqichiga tayyorgarlik olib borayotgan O‘zbekiston milliy terma jamoasi bugun Avstriyadagi yig‘in doirasida Kanada terma jamoasiga qarshi bahs olib bordi.

Anchagina qiziqarli ko‘rinish olgan bellashuvda hamyurtlarimiz 1:2 hisobida imkoniyatni boy berib qo‘yishdi.

Birinchi bo‘limning dastlabki va oxirgi 15 daqiqalari O‘zbekistonning kichik ustunligi ostida o‘tdi. Bu vaqtda Sergeyev va Shomurodov bir martadan yakkama-yakka vaziyatlardan foydalana olishmadi. Kanada esa o‘zi ustunlikka erishgan birinchi bo‘limning o‘rtasida "standart"dan hisobni ochdi.

62-daqiqada Eldor Shomurodov hisobni tenglashtirdi. Lekin o‘yinning 81-daqiqasida Akram Komilov kutilmaganda o‘z darvozasini ishg‘ol etib qo‘ydi.

Shu tariqa Samvel Babayanning 8ta o‘yindan iborat g‘alabali seriyasiga yakuniga yetdi.

O‘zbekiston – Kanada 1:2 (0:1)
Gollar: 0:1 – 20 Edgar, 1:1 – 62 Shomurodov, 1:2 – 81, Komilov (avtogol).
O‘zbekiston – Lobanov, Krimets (Azamov, 46), Hoshimov (Muhammadiyev, 60), Komilov, To‘xtaxo‘jayev, Sohibov, Jyeparov (Hasanov, 77), Shukurov, Geynrix (Hamdamov, 69), Shomurodov (Qutiboyev, 84), Sergeyev.
Kanada – Stamatopulos, Edgar (Jyekson, 81), Uimet, Yakovich, Jyeyms (Vitoriya, 14), Arfild, Pet, Xoylett (Petrasso, 81), Anri, Akindele (Haber, 60), Riketts (Hyum, 69).
Ogohlantirish: Sohibov (67).