«Barselona» Neymarga shartnomani uzaytirish bo‘yicha oxirgi marta taklif berdi

«Barselona» Neymarni tarkibda saqlab qolish maqsadida u bilan  shartnomani uzaytirish uchun yakuniy taklifini bildirdi.

Sport.es ma'lumotiga ko‘ra, kataloniyaliklar jamoasi rahbariyati  24 yoshli braziliyalikka yiliga 15 million yevrodan ortiq maosh to‘lay olmasligini bildirgan.

«Barselona»dagilarning hisoblashicha, Neymar jamoada Lionel Messidan keyingi o‘rinda turuvchi futbolchi hisoblanadi va Messi jamoadagi eng ko‘p miqdordagi maosh oluvchi futbolchi bo‘ladi.

Ayni vaqtda Neymarning belgilab qo‘yilgan transfer narxi 192 million yevroni tashkil qiladi. Uning «Barselona» bilan amaldagi shartnomasida yillik maoshi miqdori 9 million yevroni tashkil etadi.

Bundan oldinroq ushbu futbolchini Yevropaning bira to‘la 3 jamoasi 192 million yevroga sotib olishga tayyorligi ma'lum bo‘lgandi.

«Real» ushbu hujumchiga yiliga 15 million yevrodan to‘lashni nazarda tutuvchi 6 yillik shartnoma taklif etmoqda. «PSJ»da Neymarning yillik maoshi miqdori 18,5 million yevro bo‘lishi va bonuslar hisobiga bu miqdor 28 million yevroga yetishi mumkin. «MYu» esa 17 million yevrolik taklif bildirgan.

Futbolchining otasi Neymar da Silva hamda uning agenti Vagner Ribeyro Neymarga «Barselona»ni tark etishni va bildirilayotgan takliflardan biriga rozilik bildirishni tavsiya etishmoqda.

Futbolchining «Barselona» bilan amaldagi shartnomasi muddati 2018 yilning yozigacha.

Manba: Tribuna.uz