KOICA hamkorligida innovatsion Tibbiyot markazi barpo etiladi

O‘zbekiston Sog‘liqni saqlash vazirligi va Koreya xalqaro hamkorlik agentligi (KOICA), Janubiy Koreya agentligining «4-darajali chuqur ixtisoslashtirilgan klinikasi va ko‘p tarmoqli Bolalar tibbiy markazining tibbiyot xodimlari malakasini oshirish Markazini tashkil etish» loyihasini amalga oshirish bo‘yicha muhokamalar protokolini imzoladi, deb xabar qilmoqda KOICAning Toshkentdagi matbuot xizmati.

Qiymati 7 mln AQSh dollari bo‘lgan loyiha 2016−2020 yillar mobaynida amalga oshiriladi. Tibbiyot sohasida innovatsion markazini tashkil etishdan maqsad, pediatriya sohasidagi tibbiy yordam sifatini yaxshilash, pediatrlarning jarrohlik yo‘nalishi bo‘yicha amaliy salohiyatini mustahkamlash, tadqiqotlar o‘tkazish va o‘rgatish, kasallik hamda o‘lim hollarini kamaytirishga ko‘mak berishdan iborat. Loyiha doirasida Janubiy Koreya va O‘zbekistonda mahorat darslari tashkil etiladi. 

Ko‘ptarmoqli bolalar tibbiyot markazi esa, Koreya iqtisodiy taraqqiyot va hamkorlik jamg‘armasi (EDCF) ko‘magida Toshkent shahrida 2017 yilda barpo etiladi. Jamg‘arma shu maqsadda 102,846 mln dollarlik imtiyozli zayom taqdim etgan. O‘zbekistonning loyihaga qo‘shgan hissasi 27,73 mln dollarni tashkil etadi. Shundan 20,78 mln dollari soliq va bojxona imtiyozlaridir. 

Markaz 280 o‘ringa ega bo‘lib, kuniga 250 nafar bemorni qabul qila oladi. Unda, yiliga 1500ta jarrohlik amaliyotini o‘tkazish imkoni mavjud bo‘ladi.