FINA rahbari rossiyalik suzuvchi Yefimovaning tahqirlanishini qoraladi

Xalqaro suzish federatsiyasi (FINA) rahbari Xulio Maglione Olimpiadada rossiyalik suzuvchi Yuliya Yefimovaga nisbatan tahqirlovchi harakatlarni amalga oshirayotgan muxlislar va sportchilarni qoraladi. 

"Bu juda va juda yomon. Bu yerda hamma sport odamlarni birlashtirishi va ezgulik eltishini anglashlari kerak, shuning uchun men bunday harakatlarni qoralayman. Boz ustiga, Yefimova shu yerda ishtirok etayotgani bilan o‘zining "tozaligini" isbotladi", deb aytdi Maglione.

12 avgustda Xalqaro Olimpiya qo‘mitasi vakili Mark Adams sportchilar taqdirlash marosimlarida bir-birlarini tabriklamasliklari holatlari nomaqbul ekanligini aytgandi. Adams sportchilar shu tariqa "raqiblariga behurmatlik qilishlarini" ta'kidlab o‘tgan.

8 avgustda 100 metrga brass usulida oltin va bronza medallarni qo‘lga kiritgan amerikalik suzuvchilar Lilli King va Keti Meyli kumush medal sohibasi Yefimovani tabriklashdan bosh tortishgan. Musobaqa oldidan esa muxlislar Yefimovaga nisbatan hushtakbozlik qilishgan.

9 avgustda amerikalik suzuvchi Maykl Felps XOQning Yefimovani Olimpiadaga qo‘yish qarorini tanqid ostiga olgan.

6 avgustda XOQ Yefimova va avval Olimpiadadan chetlatilgan yana 4 nafar rossiyalik suzuvchini Riodagi musobaqalarga qo‘yishga qaror qilgandi.