Toshkentning bir qancha bekatlarida avtobuslar harakati jadvali va ularning aniq yetib kelish vaqti haqida xabar berib turuvchi ma'lumotlar tablosi o‘rnatilganidan xabaringiz bor. Bundan tashqari, so‘nggi vaqtlarda poytaxtdagi barcha bekatlar o‘zgacha qiyofaga kirdi – yangidan qurilib, zamonaviylashtirildi. Bularning barchasi fuqarolar qulayligi uchun amalga oshirildi. Ammo...
Ba'zi bir yurtdoshlarimiz esa bu yangilanishlardan rohat qilib foydalanish o‘rniga, ularga zarar yetkazish bilan mashg‘ullar nazarimizda. Xususan, Facebook ijtimoiy tarmog‘i foydalanuvchilaridan biri Toshkent shahrining Oloy bozori yonida barpo etilgan yangi, zamonaviy bekatdagi holat tasvirlangan fotosuratni taqdim etdi. Unda mobil uskunalarni quvvatlantirishga mo‘ljallangan moslamaga zarar yetkazilganini ko‘rish mumkin.
Bu holat ijtimoiy tarmoq foydalanuvchilarining hayrati va g‘azabiga sabab bo‘ldi. Xususan, ulardan biri “Bunaqa narsalarni yulish, eskidan qolgan - skameykalarni tepib sindirish bilan barobar - "krutoy"lik belgisi hisoblanadi. Boshqa izohi yo‘q, bo‘lmagan, bo‘lmaydi ham...”, deb yozgan.
Shu o‘rinda maxsus eslatmani yodingizga solgan bo‘lardik: Hurmatli poytaxtimiz aholisi. Bekat majmualari va undagi barcha qulayliklar faqatgina sizning manfaatingizni ko‘zlab o‘rnatilgan. Umumiy boyliklarimizni ehtiyotlaylik. Vayron etishga yo‘l qo‘ymaylik!