Maktablar 11 yillik tizimga qaytadi...mi? Masalaga oydinlik kiritildi

26 yanvar kuni "2017-2021 yillarda O‘zbekiston Respublikasini rivojlantirishning besh yo‘nalishi bo‘yicha Harakatlar strategiyasi" loyihasiga bag‘ishlangan mediahaftalikda navbatdagi yo‘nalish bo‘yicha taqdimot va muzokaralar o‘tkazildi. 

"Ijtimoiy sohani rivojlantirishning ustuvor yo‘nalishlari"ga bag‘ishlangan bugungi tadbirda oylik va maoshlar, nafaqa va ijtimoiy nafaqalarning bosqichma-bosqich oshib borilishi, aholi bandligini oshirishning samarali usullari, aholini arzon va zamonaviy uy-joylar bilan ta'minlash, aholining yashash sharoitini yaxshilash, ijtimoiy infratuzilmani modernizatsiya qilish, aholini ijtimoiy himoya qilish, sog‘liqni saqlash tizimi, ta'lim va fan sohasi bo‘yicha  taqdimotlar namoyish etildi. 

To‘rtinchi yo‘nalish o‘z ichiga ko‘plab muhim sohalarni qamrab olgani uchun qizg‘in muhokamalarga boy bo‘ldi. Ishtirokchilar notiqlarga o‘z savol va takliflarini yo‘llab, javob olishga muvaffaq bo‘lishdi.

Ayni damda ijtimoiy tarmoqlardagi foydalanuvchilar orasida ommalashgan "Maktablarning 11 yillik ta'lim tizimiga qaytishi" haqidagi savolga ham oydinlik kiritildi. 

Mazkur savolga O‘zbekiston Respublikasi Iqtisodiyot vaziri o‘rinbosari Dilmurod Turdiyev quyidagicha javob berdi: 

"Hozirda biz 9+3, ya'ni 9 yil maktab va 3 yil litsey yoki kasb-hunar kollejlardagi ta'lim tizimi bo‘yicha ishlaymiz va bu tizim o‘zini to‘laqonli oqlamoqda. Agarda mazkur masalada qandaydir o‘zgarishlar bo‘lsa, OAV xodimlari, albatta, birinchilardan bo‘lib xabardor bo‘lishadi".

Demak, maktablarning 11 yillik ta'lim tizimga qaytishi haqida tarqalgan gaplar shunchaki mish-mish ekanligi tasdiqlandi.