Binafsharang gul yoki qashqadaryolik yoshi katta ayolning qilmishi

Farida opa (ism-familiyasi o‘zgartirilgan) tabiatan intiluvchan, harakatchan ayol. Bir yerda tinch o‘tira olmaydi. Bekor o‘tirishni istamay, hali uy-ro‘zg‘or, hali tomorqa ishlari bilan o‘zini ovutadi. Tomorqasi shahardagi boshqa hovlilar singari kichkina bo‘lsa-da, kaftdek yerga ham turli gul ko‘chatlari, ziravorlar ekib, yashnatib qo‘yadi, deb yozadi “Huquq” gazetasi.

Bahor kelishi bilan opa tomorqa ishlariga butun qalb qo‘ri bilan kirishib ketdi. Yerni obdon yumshatib, har xil gul va ko‘kat urug‘larini ekdi.

Ko‘p o‘tmay, ekilgan urug‘lar bo‘y ko‘rsatdi. Opa hovlini aylanib yurarkan, ko‘ngli ravshan tortdi. U kundan-kunga bo‘y cho‘zib borayotgan nihollarni mehr bilan parvarishladi. Mehnati behuda ketmaganligidan quvondi.

Hovliga chiroy baxsh etib turgan ko‘katlar kun sayin baravj o‘sardi. Biroq ular orasidagi binafsharang bo‘lib gullay boshlagan ba'zi nihollar Farida opaning e'tiborini tortdi. Oldin bunaqa gulni hech qayerda ko‘rmagandi. Chetdan qaraganda ular boshqa gullardan sira farq qilmasdi. Ammo undan taralayotgan hid butunlay begona, boshqacha edi. Bir safar kechasi turgan qattiq shamol ushbu o‘simlik navdalarini sindirib, egib tashlaganida opa erinmay ularni daraxt shoxlariga qayta bog‘lab chiqdi. Ko‘p o‘tmay, bu gullar aslida qanday o‘simlik ekanini anglaganday bo‘ldi. Hovlisidagi binafsha gulli o‘simlik ko‘knori ekanini sezdi. Ammo uyidagilar uning gullari va ko‘katlariga e'tibor berishmaganidan foydalanib, bu haqda ularga bir og‘iz ham gapirmadi.

O‘tgan yilning may oyida opa hovlisi tepasida paydo bo‘lgan vertolyotning ovozidan cho‘chib, osmonga qaradi.

-  Bu vertolyot namuncha ko‘p aylanmasa, kelin.

-  Bilmadim, oyijon.

Farida opa yana nimadir demoqchi bo‘lgan edi hamki, darvoza taqilladi. Opa uyiga kirib kelgan IIB xodimlarini ko‘rib, yuragi shuv etdi.

IIB xodimlari xolislar ishtirokida hovlini ko‘zdan kechirib, ekinlar orasidagi taqiqlangan o‘simlik – 173 tup ko‘knorini ashyoviy dalil sifatida hujjatlashtirib olishdi.

Jinoyat ishlari bo‘yicha Qarshi shahar sudi Farida Chamanovaning ushbu qilmishini atroflicha ko‘rib chiqib, unga nisbatan eng kam oylik ish haqining 25 baravari miqdorida jarima va 6 yil muddatga ozodlikdan mahrum etish jazosini tayinladi. Biroq unga tayinlangan ozodlikdan mahrum etish jazosi Jinoyat kodeksining 72-moddasiga binoan shartli hisoblanib, 2 yil sinov muddati belgilandi.