Sobiq ittifoq davrida O‘zbekiston mustaqilligi yo‘lida maxfiy tashkilot tuzgan Mirtemir Mirabdullayev vafot etdi

Sobiq ittifoq davrida O‘zbekiston mustaqilligi g‘oyasini ko‘targan, o‘tgan asrning 60-yillari oxirida «Ozod uyushma» tashkilotiga asos solib, mamlakat mustaqilligi uchun sovetlarga qarshi borgan Mirtemir Mirabdullayev 78 yoshida vafot etdi. Bu haqda «Kun.uz» manbasi xabar berdi.

Yashirin tashkilot asoschisi va rahbari bo‘lgan Mirtemir Mirabdullayev 1940 yil Toshkent shahridagi Beshyog‘och mahallasida tug‘ilgan.

2000 yili nashr etilgan «O‘zbekistonning yangi tarixi» kitobining ikkinchi tomida yozilishicha, Mirabdullayev o‘tgan asrning 60-yillarida, ToshDUning siyosiy iqtisod kafedrasida o‘qituvchi sifatida faoliyat yuritayotgan vaqtida mamlakat ozodligi harakati tashabbuskorlari bo‘lgan hammaslaklari bilan «Ozod uyushma» tashkilotini tuzgan. 

Uyushma a'zolari O‘zbekiston SSSRdan ajralib chiqishi va mustaqil davlat barpo qilish, o‘zbeklar boshqalarning yordamisiz ham o‘z iqtisodiyotini rivojlantirishga, mamlakatni o‘zlari boshqarishga qodir, degan g‘oyaga asoslangan edi. Lekin «Ozod uyushma» oyoqqa turmasdan, uning tashkilotchilaridan biri bo‘lgan Mirabdullayev qamoqqa olinadi va 1971 yil 31 avgustida Toshkent shahar sudi tomonidan unga O‘zSSR JK 64-moddasi «millatchi» tamg‘asi bosilib, jinoiy javobgarlikka tortiladi hamda 3 yilga qamaladi. Faqat O‘zbekiston mustaqillikni qo‘lga kiritganidan so‘ng adolat qaror topib, 1992 yil bahorida Mirtemir Mirabdullayev oqlangan.