Eronda IShIDning sakkiz nafar a'zosi qatl etildi

Eron hukumati IShID guruhining 2017 yilda Tehronda sodir etilgan hujumlarga aloqador sakkiz nafar a'zosiga nisbatan chiqarilgan o‘lim hukmini ijro etdi, deb xabar qildi Tasnim agentligi.

"Eron IShIDning 2017 yilda Tehronda sodir etilgan hujumlarga aloqador sakkiz jangarisini qatl etdi", — deyiladi agentlikning Twitter akkauntida.

2017 yil 7 iyunda ayollar kiyimida bo‘lgan to‘rt kishi Eron parlamenti binosida o‘t ochgan, keyinroq ulardan biri o‘zini portlatib yuborgan. Imom Humayniy maqbarasida ham hujum sodir etilgan: hujum qilganlardan biri o‘zini portlatgan. Terrorchilar hujumi oqibatida 20ga yaqin kishi halok bo‘lgan, o‘nlab insonlar jarohatlangan.

Eron inqilobiy sudi 13 may kuni IShIDning bu hujumlarga aloqador sakkiz a'zosiga nisbatan o‘lim hukmini chiqardi. 11 iyun kuni Eron Oliy sudi bu hukmni tasdiqladi.