Rossiyaning “NTV Plyus“ telekompaniyasi rahbari asli toshkentlik ekanini ma'lum qildi

Rossiyaning eng yirik telekommunikatsiya kompaniyasi – “NTV plyus“ bosh direktori Mixail Dyomin Toshkentda tug‘ilib-o‘sganligini aytdi.

Dyomin O‘zbekiston-Rossiya media-forumida ishtirok etmoqda. 

“Bilasizmi, men Toshkentda tug‘ilganman, u mening ona shahrim, bolaligim yodgorligi. Doim “Farhod“ bozoridan bozor-o‘char qilardik. Buvimni aytmaysizmi, sof o‘zbek tilida gaplashardi. Bularning bari kechagidek yodimda”, - degan u O‘zAga bergan intervyusida

Uning so‘zlariga ko‘ra, O‘zbekiston-Rossiya media-forumi ikki mamlakatning media sohasi bo‘yicha faol hamkorlik qilishida ko‘prik vazifasini o‘taydi. 

“Biz o‘zaro muloqotda kompaniyamizning telekommunikatsiya sohasidagi tajribalari bilan o‘rtoqlashdik“ dedi u. 

Bugungi kunda “NTV Plyus“ – sun'iy yo‘ldosh raqamli televideniye (HDTV)ning 270 ta kanalini o‘zida jamlagan, Rossiya telekommunikatsiya bozorida muvaffaqiyat qozongan yetakchi kompaniyalardan hisoblanadi.