AQSh sanksiya kiritadigan bo‘lsa, Turkiya Boeing samolyotlari sotib olishni to‘xtatishi mumkin

AQSh S-400 zenit-raketa majmualarini sotib olganligi uchun Turkiyaga sanksiya kiritadigan bo‘lsa, Turkiya Amerikaning Boeing samolyotlarini sotib olishdan voz kechishi mumkin. Bu haqda mamlakat prezidenti Rajab Tayyip Erdo‘g‘an ma'lum qildi.

Rossiyaning S-400 tizimlarini sotib olish Turkiya va AQSh o‘rtasida ziddiyat keltirib chiqardi. Qo‘shma Shtatlar Rossiya quroli o‘rniga AQShning Patriot majmualarini sotib olishni talab qildi va Anqaraga F-35 qiruvchi samolyotlarini sotmasligini aytib tahdid qildi.

"Biz yangi avlod Boeing samolyotlarini sotib olmoqdamiz. Biz yaxshi mijozlarmiz. Agarda sanksiyalar kiritiladigan bo‘lsa, biz bu borada o‘ylab ko‘rishimizga to‘g‘ri keladi", - dedi Erdo‘g‘an Anqarada chiqish qilgan chog‘ida.

Avvalroq Erdo‘g‘an sanksiyalar orqali tahdid qilish Turkiyani tanlagan yo‘lini o‘zgartirishga majbur qila olmasligini aytgandi.