Qozog‘iston prezidenti Qosim-Jomart Toqayevning fotosuratlaridan onlayn-kazino reklamasida noqonuniy ravishda foydalanilgan. Bu haqda mamlakat prezidentining matbuot kotibi Berik Kurmangali ma'lum qildi.
"Menga ijtimoiy tarmoqlarda prezident Qosim-Jomart Toqayev suratidan foydalanilgan onlayn-kazino reklamasi paydo bo‘lganligi to‘g‘risida ommaviy axborot vositalaridan murojaatlar kelib tushmoqda. Davlat rahbarining bu reklamaga hech qanday aloqasi yo‘q, uning fotosuratlaridan noqonuniy ravishda foydalanishganligini rasman bildiraman", - deb yozdi Kurmangali o‘zining Facebook sahifasida.
U buning "nohalol soxta reklama" ekanligini ta'kidladi.
"Barcha ijtimoiy tarmoqlarni tijorat materiallarini joylashda mas'uliyatli bo‘lishga va o‘zgalarning fotosuratlaridan noqonuniy foydalanmaslikka chaqiraman", - deya qayd etdi Kurmangali.
