Eronda karantin choralari yumshatilmoqda

Eronda dushanbadan boshlab xalqaro avtomagistrallar ochilmoqda, bundan tashqari, karantin choralari yumshatilishi doirasida yirik savdo markazlari o‘z ishini boshladi. Bu haqda Associated Press (AP) agentligi xabar berdi.

Xabarda aytilishicha, lyuks toifasidagi savdo markazlari va bozorlar ochilgan. Ammo savdo markazlari faqat 18:00gacha ishlaydi.

Shu bilan birga, qayd etilishicha, restoranlar, sport zallari va boshqa jamoat muassasalari hozircha ochilmaydi. Masjid va boshqa diniy obektlar ham yopiqligicha qoladi.

Avvalroq Eron prezidenti Hasan Ruhoniy masjid va maqbaralar 4 maydan ochilishi mumkinligini aytgandi.  

Agentlikning eslatishicha, Eron hukumati avvalroq keng miqyosdagi izolyatsiya rejimini joriy etishni istamagan. Hukumatning izohlashicha, mamlakat AQSh sanksiyalari ostida bo‘lgani uchun karantin choralarining iqtisodiyotga ta'sirini hisobga olish lozim. 

Oxirgi ma'lumotlarga ko‘ra, mamlakatda koronavirusga chalinish bilan bog‘liq 82211 ta holat qayd etilgan, 5118 kishi vafot etgan, 57023 nafar kishi sog‘aygan.