Nigeriya Afrikada birinchi bo‘lib karantin choralarini yumshatadi

Koronavirus pandemiyasi sababli Nigeriyaning yirik shaharlarida 30 martdan joriy etilgan karantin choralari 4 maydan yumshatiladi. Bu haqda The Nation gazetasi xabar berdi.

Mamlakatda karantin o‘rniga soat 20:00dan 06:00gacha komendantlik soati joriy etiladi.  Tibbiy niqob taqish, yig‘ilishlar o‘tkazmaslik talablari saqlanib qoladi, aholini koronavirusga testdan o‘tkazish kengaytiriladi.

"Poytaxt okrugi, Lagos va Ogun shtatlarida cheklov choralarini bosqichma-bosqich yengillatish ma'qullandi", - dedi Nigeriya prezidenti Muhammadu Buxoriy xalqqa telemurojaatida.

Bu hududlarda aholi harakatlanishi cheklangan va uydan faqatgina oziq-ovqat do‘koni yoki dorixonaga chiqishga ruxsat etilgandi. Dushanbadan bu cheklovlar bekor qilinadi.

Nigeriya rahbari karantin choralari yumshatilishiga sabab pandemiyani to‘xtatish bo‘yicha ko‘rilgan choralarning samarali bo‘lganligi bilan izohladi.

Ma'lumotlarga ko‘ra, Nigeriyada koronavirusga chalinganlar soni 1337 kishi bo‘lib, 40 kishi vafot etgan.