Marg‘ilon shahar musiqali maqom teatrining oliy toifali drama artisti Kimsanboy Sobirov 65 yoshida vafot etdi. Bu haqda Madaniyat vazirligi ma'lum qildi.
Yusufjon qiziq Shakarjonov nomidagi Farg‘ona viloyat musiqali drama teatrida Sharof Boshbekov asari asosida sahnalashtirilgan «Temir xotin» spektakli xalqning sevimli sahna asariga aylangan. Spektaklda Kimsanboy Sobirov Olim rolini maromiga yetkazib ijro etgan. Shu sababli muxlislar Kimsanboy Sobirovga «Olimtoy» deya murojaat qilishlari bejiz emas.
Kimsanboy Sobirov ijodiy faoliyati davomida o‘nlab rollarni maromiga yetkazib ijro etgan. Mamlakat mustaqilligining 29 yilligi arfasida prezident farmoniga ko‘ra Kimsanboy Sobirov «Do‘stlik» ordeni bilan taqdirlandi.
Kun.uz tahririyati marhumning oila-a'zolariga chuqur ta'ziya izhor qiladi.