OTMlarda o‘qish qachondan an'anaviy shaklga qaytishi hali aniq emas – vazirlik ijtimoiy tarmoqdagi xabarlarni rad etdi

Ijtimoiy tarmoqlarda OTMlarda o‘quv yili 2021 yil fevral oyiga qadar masofaviy shaklda davom etishi ma'lum qilingani haqida xabarlar tarqaldi. Bu xabarlarda Oliy va o‘rta maxsus ta'lim vazirligi axborot xizmati rahbari Farhod Babashevning «Sevimli» telekanali muxbiriga bergan intervyusi asos qilib ko‘rsatilgan. Kun.uz muxbiri mazkur xabarga aniqlik kiritish maqsadida vazirlik axborot xizmati rahbari bilan bog‘landi.

Vazirlik vakilining aytishicha, u intervyuda ta'limning an'anaviy shakliga epidemiologik holatdan kelib chiqib o‘tilishini, bu balki 2-3 oydan keyin, balki 2-semestrda bo‘lishi mumkinligini aytgandi.

«Intervyuda men aytgan ayrim gaplar tushib qolgan. Men hamma ham an'anaviy ta'lim shakli samarali ekanini bilishini, lekin bu shaklga o‘tish uchun maxsus komissiya qarori inobatga olinishini, masofaviy ta'lim ikkinchi semestrga qadar ham davom etishini, ikkinchi semestr esa fevralda boshlanishini aytgandim.

Hozirda har ehtimolga qarshi ta'lim shaklini masofaviy tarzda olib borish uchun bir semestrlik dasturlar, videodarslar tayyorlanmoqda. Chunki vaziyatga qarab, an'anaviy shaklga o‘tiladigan bo‘lsa, hamma uchun yaxshi. Lekin biz qaysidir sanani hozirdan aytib qo‘ysak, lekin o‘sha paytga borib an'anaviy shaklga o‘tilmaydigan bo‘lsa, o‘qituvchilar onlayn dars materiallarini tayyorlashda sustkashlikka yo‘l qo‘yishi, talabalar ham masofaviy shakldagi darslarda to‘liq qatnashmay qo‘yishi mumkin», deydi Farhod Babashev.

Vazirlik matbuot kotibi an'anaviy shaklga o‘tish uchun ko‘p jihatlar hisobga olinishini ham aytib o‘tdi.

«Mart oyida 80 ming talaba viloyatlarga qaytarilgan edi. Qabul kvotalari ko‘paygani hisobiga yangi o‘quv yilida 1-kurslar bilan qo‘shib hisoblasa, 100 ming talaba poytaxtga keladi. Odatda, poytaxtda avgust oyida metro, avtobuslarda odamlar kam bo‘ladi, sentyabrdan boshlab esa hamma joyda odamlar ko‘payadi. Shuning o‘zi o‘quv yili boshlanganini bildiradi.

Pandemiya vaziyatida 100 ming talabaning poytaxtga qaytishi ijtimoiy masofa saqlash imkonini pasaytiradi. Bu – an'anaviy ta'lim shakliga o‘tish uchun e'tibor berilishi kerak bo‘lgan bir jihat.

Ikkinchi jihat esa hozir talabalar turar joylarining karantin hududlari sifatida foydalanilayotgani va zaxiraga berilgani bilan bog‘liq. Vaholanki, poytaxtga qaytadigan 100 ming talabaning kamida 30-40 mingida yotoqxonada yashash ehtiyoji bo‘ladi. Bu vaziyatda talabalar ijarada turishiga to‘g‘ri kelib qoladi. Natijada talabalar holatdan norozi bo‘lishi mumkin», deya qayd etdi Farhod Babashev.

Uning qo‘shimcha qilishicha, ta'limni an'anaviy shaklga o‘tkazishdan oldin barcha jihatlar inobatga olinadi va shunga qarab xulosa qilinadi. Lekin bu qachon yuz berishi hali ma'lum emas.

Eslatib o‘tamiz, OTMlarning yuqori kurs talabalari uchun o‘quv yili 2-sentyabrdan masofaviy tarzda boshlandi, birinchi bosqich talabalari uchun esa kirish imtihonlari tugagach, 2 oktyabrdan masofaviy tarzda boshlanadi.