«Prezident siyosatiga zid» - Komil Allamjonov Azon.uz'ga qilingan bosimni qoraladi

Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov Azon.uz saytidan maqolalarni o‘chirib tashlash talab qilinganiga munosabat bildirdi.

«Azon.uz tahririyatiga bo‘lgan bosim nafaqat samarasiz harakat, balki O‘zbekiston Respublikasi Prezidenti Sh.Mirziyoyev tomonidan olib borilayotgan ochiqlik va oshkoralik siyosatiga ham ziddir.

Hozirgi zamon sharoitida har bir rahbar muloqot qilish va matbuot bilan o‘zaro konstruktiv aloqalarni o‘rnatish ko‘nikmalariga ega bo‘lishi shart. Aks holda, muammo bo‘laveradi», – deya yozib qoldirdi Allamjonov Telegram'dagi kanalida.

Eslatib o‘tamiz, Azon.uz sayti bosh muharriri Abdulaziz Muborak 3 fevral kuni tahririyatga Din ishlari bo‘yicha qo‘mita raisi o‘rinbosari Dilshod Eshnayevdan bosim va tahdid bo‘lganini ma'lum qilgandi.

Sayt muassisi, diniy olim Mubashshir Ahmadning so‘zlariga ko‘ra, Dilshod Eshnayev 3 fevral kuni unga yashirin raqamdan qo‘ng‘iroq qilib, maqolalarni darhol o‘chirishni talab qilgan va kurakda turmas so‘zlar bilan haqoratlagan.

Din ishlari bo‘yicha qo‘mita bayonotida Azon.uz saytidagi maqolalarni olib tashlash bo‘yicha «qo‘mita rahbariyati tomonidan hech qanday topshiriq bo‘lmagani» aytiladi.