11:51 / 04.02.2021
11712
Дин ишлари бўйича қўмита Azon.uz сайтидаги мақолаларни ўчириш бўйича топшириқ берилмаганини маълум қилди

Дин ишлари бўйича қўмита раҳбарияти Azon.uz сайтида эълон қилинган мақолаларни олдириб ташлаш бўйича ҳеч қандай топшириқ берилмаганини маълум қилди. Лекин баёнотда қўмита раиси ўринбосари Дилшод Эшнаев сайт муассиси Мубашшир Аҳмадни ҳақорат қилгани борасида ҳеч нарса дейилмаган.

3 феврал куни Azon.uz сайти бош муҳаррири Абдулазиз Раимов (Абдулазиз Муборак) Дин ишлари бўйича қўмита раисининг ўринбосари Дилшод Эшнаев томонидан таҳририятга босим ва таҳдид бўлаётгани ортидан ишдан бўшашини маълум қилганди. Ушбу ҳолат юзасидан Дин ишлари бўйича қўмита расмий баёнот берди.

Маълум қилинишича, Дин ишлари бўйича қўмита виждон эркинлиги ва диний ташкилотлар тўғрисидаги қонун ҳужжатларига мувофиқ дин ишлари соҳасида ягона давлат сиёсатини амалга оширади ва бу борада бир қанча ваколатларга эга.

Баёнотда айтилишича, жамиятда ижтимоий-маънавий муҳит барқарорлиги ва эътиқод эркинлигига таҳдид туғдириши мумкин бўлган омилларни ўрганиш, таҳлил қилиш ва уларнинг олдини олишга қаратилган чораларни кўриш, республикада чиқариладиган ёки чет эллардан келтириладиган диний тусдаги маҳсулотларни (матбуот ва электрон нашрларни, аудио, видео кассеталарни, CD, DVD ва бошқа электрон ташувчиларни, Интернет бутунжаҳон ахборот тармоғида жойлаштирилган диний материалларни) экспертизадан ўтказиш фаолиятини мувофиқлаштириш Дин ишлари бўйича қўмитанинг асосий вазифаларидан ҳисобланади.

Шунингдек, Дин ишлари бўйича қўмита раҳбарияти Азон.уз сайтида эълон қилинган мақолаларни олдириб ташлаш бўйича ҳеч қандай топшириқ бермаганини таъкидлади.

«Шундан келиб чиқиб, Дин ишлари бўйича қўмита диний мазмундаги материалларни тайёрлаш ва тарқатишда диний-маърифий сайтларга йўналиш ва тавсия бериши мумкин. Лекин, қайсидир сайтдан қандайдир маълумотни олдириб ташлаш ёки олиб ташлашга мажбур қилиш ваколатига эга эмас.

Шунга кўра, Azon.uz сайтида эълон қилинган муайян мақолаларни олдириб ташлаш бўйича Қўмита раҳбарияти томонидан ҳеч қандай топшириқ бўлмаганини қатъий маълум қиламиз.

…Баёнот якунида, юртдошларимизга яна бир бора, Дин ишлари бўйича қўмита раҳбарияти томонидан Azon.uz сайти таҳририяти ва жамоасига мақолани олдириб ташлаш бўйича босим бўлмаганини, аксинча сайтда берилаётган хабар ва мақолалар кенг халқ оммасига мўлжаллангани учун фойдали ва холис бўлиши борасида доимий ҳамкорлик қилиб келаётганини билдирамиз», дейилади баёнотда.

Лекин, қўмита баёнотида Дилшод Эшнаев сайт муассиси Мубашшир Аҳмадни ҳақорат қилгани борасида умуман ҳеч нарса дейилмаган.

Эслатиб ўтамиз, Azon.uz сайти бош муҳаррири Абдулазиз Раимов таҳририятга босим ва таҳдид бўлгани сабаб ишдан бўшаш ҳақида баёнот берган эди.

«Бугун муассисимиз Мубашшир Аҳмад йиғилиш чақирдилар. Сайтимизда эълон қилинган айрим мақолаларни олиб ташлашимизни айтдилар», – деб ёзади Абдулазиз Муборак. Унинг айтишича, сайтдаги қуйидаги мақолаларнинг олиб ташланиши айтилган (ҳозирда бу мақолалар сайтдан ўчирилмаган):

«Билишимизча, Дин ишлари бўйича қўмита раисининг ўринбосари Дилшод Эшнаев Мубашшир Аҳмадга қўнғироқ қилиб, юқоридаги мақолалар учун жуда қаттиқ ҳақорат ва таҳдид қилибди. Шундай ҳақоратларки, уни айтиш тилга, эшитиш қулоққа оғирлик қилади. Мен домланинг гапларига кўнмадим (мақолаларни ўчиртирмадим), чунки ҳар икки мақолада ҳам муҳтарам президентимиз Шавкат Мирзиёев томонидан олиб борилаётган ислоҳотлар ёритилган, яъни бир сўз билан айтганда, сиёсатга қарши эмас, аксинча, уни қўллаб-қувватлайдиган фикрлар ёзилганди.

Авваллари ҳам бир неча мақолалар олиб ташланган эди, бугун билишимча, ўша мақолалар ҳам айнан Д.Эшнаевнинг қўнғироқлари орқасидан ўчирилган экан. Д.Эшнаевнинг хизмат ваколатига сайтлардаги диний мазмунда ёзилган хабар ва мақолаларни кузатиш, таҳлил қилиш кирар, аммо у нега айнан давлатимиз раҳбарининг фикрлари, ислоҳотлари, ташаббуслари ёритилган мақолаларга эътироз билдиради?», деган эди у.

Шунингдек, ҳолат юзасидан Ахборот ва оммавий коммуникациялар агентлиги баёнот билан чиқиб, давлат идораларидан журналистларга босим ўтказмасликни сўради.

«Ўзбекистоннинг янги очиқлик ва ошкоралик сиёсатида давлат идоралари ва журналистлар ўртасидаги баҳсли масалалар имкон қадар ўзаро келишув, агарда бунинг иложи топилмаса ҳуқуқий меъёрлардаги тартиблар асосида ҳал этилиши мақсадга мувофиқдир. Хусусан, диний мазмундаги материалларни тайёрлаш ва тарқатишда низоли ҳолатлар юзага келганда ҳам масаланинг ечими суд орқали ҳал этилиши белгиланган.

Агентлик доимгидек давлат органлари ва оммавий ахборот воситаларини қонунчиликда кўрсатиб ўтилган қоидалар ҳамда ўрнатилган талабларни ҳурмат қилган ҳолда ўзаро муносабатларга киришишга чақиради. Шунингдек, давлат идораларини журналистларга нисбатан босим ўтказмаслик, таҳририят ходимларини эса журналистлик одоб-ахлоқ қоидаларига амал қилишини сўрайди», дейилади АОКА расмий сайтида эълон қилинган релизда.

Top