Turkiyada Istanbul kanali qurilishi boshlandi

Turkiya prezidenti Rajab Toyyib Erdo‘g‘an Bosfor bo‘g‘oziga parallel o‘tadigan hamda Qora va Marmar dengizlarini bog‘laydigan Istanbul kanali qurilishiga start berdi.

U tantanali marosimda ishtirok etdi va ramziy tugmani bosib loyiha amalga oshirilishini boshlab berdi.

Uning so‘zlariga ko‘ra, kanal uzunligi 45 kilometr, eni 275 metr va chuqurligi 21 metr bo‘ladi.

Istanbul kanali loyihasi qiymati 15 milliard dollarga teng bo‘lib, loyiha olti yil davomida amalga oshiriladi.

«Bugungi kunda Bosfor orqali yiliga 45 mingta kema o‘tadi. Har bir ulkan kemaning o‘tishi shahar uchun xavf tug‘diradi, ular turli yuklarni tashiydi va halokat yuz beradigan bo‘lsa, shahar xatar ostida qoladi», dedi Turkiya prezidenti.

Erdo‘g‘an kanal qurilishi to‘g‘risida ilk bor 2011 yilda, bosh vazirlik paytida aytgandi.