Sirdaryolik xotin-qizlar uchun oliygohlarga kirish davlat granti 3 barobar oshiriladi - Shavkat Mirziyoyev

“O‘quvchilar ta'lim olish bilan birga, sport bilan shug‘ullanishi, Ay-Ti texnologiyalari va zamonaviy kasblarni, musiqa va san'atni o‘rganishi uchun barcha sharoitlar yaratiladi. Ushbu yangi tajribani Guliston va Yangiyer shaharlari, Boyovut, Mirzaobod, Oqoltin, Sardoba, Sirdaryo va Xovos tumanlarida yangi quriladigan 22 ta maktabda boshlaymiz. 

Shuningdek, kelgusi besh yilda sirdaryolik xotin-qizlar uchun, oliygohlarga kirish davlat granti 3 barobar oshiriladi.

Viloyatda aholi salomatligini saqlash bo‘yicha keng ko‘lamli ishlar amalga oshiriladi. Buning uchun, avvalo, birlamchi tizimni profilaktikaga qayta yo‘naltirish, skrining tekshiruvlarini ommalashtirish ustuvor vazifa etib belgilanadi.

Barcha tuman va shahar markaziy poliklinikalarida onkonazorat xonalari tashkil etiladi. Onkologik kasalliklarni erta aniqlash uchun 40 yoshdan oshgan 310 ming nafar aholi har yili skrining tekshiruvidan o‘tkaziladi. Shuningdek, ayollar o‘rtasida skrining o‘tkazishni kengaytirish uchun mobil mammograf ajratiladi.

Shuningdek, viloyatning 93 ta tibbiyot muassasasi to‘liq raqamlashtiriladi va respublika markazlari bilan telemeditsina yo‘lga qo‘yiladi. Sirdaryo, Oqoltin va Yangiyerda 3 ta tumanlararo perinatal markazlar tashkil qilinadi va to‘liq jihozlanadi. Oqoltin va Sirdaryo tumanlarida jarohatlar va o‘tkir qon-tomir kasalliklari markazlari tashkil qilinadi hamda gemodializ xizmati yo‘lga qo‘yiladi.

Shuningdek, har yili 285 ming nafar bolalar va 15 ming homilador ayollar vitaminlar bilan bepul ta'minlanadi.

Ma'lumki, mamlakatimizda ilk bor tibbiy sug‘urta tizimi Sirdaryoda tajriba-sinov tariqasida joriy qilinmoqda. Bugungi kunda, Sirdaryodagi 29 ta davlat tibbiyot muassasalari tomonidan aholiga kafolatlangan bepul tibbiy xizmatlar va dori vositalari  oilaviy shifokor tomonidan beriladigan yo‘llanma asosida taqdim etilmoqda.

Eng muhimi, eski, viloyatda samarasiz moliyalashtirish tizimidan voz kechilib, shifoxonalar bajargan ishi va erishilgan natijalar asosida “har bir davolangan holat” uchun mablag‘ olmoqda. Endi, davolash ishlariga viloyatdagi xususiy klinikalar ham jalb etiladi. Ushbu tizim 2023 yildan boshlab, mamlakatimizning barcha hududlarida ham joriy etiladi.

Kelgusi yilda 6 ta viloyat shifoxonasi birlashtiriladi va Tibbiyot klasteri o‘z faoliyatini boshlaydi. Ushbu klasterga xorijiy davlatlarning eng ilg‘or klinikalari hamkor sifatida jalb qilinadi hamda barcha murakkab va yuqori texnologik amaliyotlarni o‘tkazish yo‘lga qo‘yiladi.

Shuningdek, mamlakatimizda ilk bor tashkil etilayotgan ushbu klaster va boshqa tibbiyot muassasalarini zamonaviy kadrlar bilan ta'minlash maqsadida, Guliston tibbiyot kolleji negizida Turkiyaning “Sog‘liq bilimlari universiteti” filiali tashkil etiladi.

Umuman olganda, kelgusi besh yilda Sirdaryo viloyatini iqtisodiy  va ijtimoiy rivojlantirish uchun  davlatdan jami 40,5 trillion so‘m, jumladan davlat budjetidan 4,4 trillion so‘m yo‘naltiriladi.

"Nima uchun 3 mln aholisi bor boshqa viloyatlarga ham, Sirdaryoga ham buncha pul?" degan savol qo‘yilsa javobim bor – Sirdaryo og‘ir hudud, muammolari ko‘p. 

Agar Sirdaryoni “korrupsiyadan xoli hudud”ga aylantirsak, ushbu mablag‘lar hisobidan yanada ko‘proq ehtiyojmand aholimiz og‘irini yengil qila olamiz. Masalan, 10 mln dollar biror korxonaga ajratgan bo‘lsak, ichiga kirib borilsa, shundan ham 1 mln dollar iqtisod qilsa bo‘ladi. Eng katta xavf bizda korrupsiya bor, o‘g‘irlik bor”, dedi prezidentlikka nomzod.