Rossiyada ilk marta bir sutkada 37 mingdan ortiq kishida koronavirus aniqlandi

Rossiyada oxirgi sutkada 37141 kishida koronavirus aniqlandi. Bu pandemiya boshlanganidan buyon mutlaq rekord hisoblanadi. 

Eng ko‘p yangi holat Moskvada qayd etildi – 8166ta. Keyingi o‘rinlarda Sankt-Peterburg (3233 kishi) va Moskva oblasti (2428 kishi) turibdi.

Federal shtab ma'lumotiga ko‘ra, o‘tgan sutkada 1064 nafar bemor vafot etgan bo‘lib, bu ham pandemiya boshlanganidan buyon qayd etilgan eng yuqori ko‘rsatkich hisoblanadi.

Avvalroq koronavirus bilan bog‘liq vaziyat og‘irlashgani munosabati bilan Rossiya prezidenti Vladimir Putin mamlakatda 30 oktyabrdan 7 noyabrgacha bo‘lgan muddatni ishlanmaydigan kunlar sifatida belgilagandi.