18:53 / 27.10.2021
2684
БМТ бош котиби жаҳон ҳамжамиятини Афғонистон иқтисодиётини қутқаришга чақирди

Аввалроқ Хитой ташқи ишлар вазири Ван И АҚШ ва Ғарб давлатларини Афғонистондан санкцияларни олиб ташлашга чақирганди.

Фото: Reuters

Афғонистон иқтисодиёти тўлиқ инқирозга юз тутмаслигига ёрдам бериш учун жаҳон ҳамжамияти мамлакатлари биргаликда ишлаши лозим, деди БМТ бош котиби Антониу Гутерриш.

“Биз Афғонистон иқтисодиёти буткул инқирозга учрамаслиги йўлини топишимиз керак. Мамлакат иқтисодиётини яна нафас олишга мажбур қилиш учун биргаликда ишлашимиз лозим”, — деди у Афғонистонга қўшни мамлакатлар учрашуви иштирокчиларига мурожаатида.

БМТ бош котибининг қўшимча қилишича, Афғонистон иқтисодиётини қўллаб-қувватлаш учун унинг ликвидлигини ошириш даркор.

Аввалроқ Хитой ташқи ишлар вазири Ван И АҚШ ва Ғарб давлатларини Афғонистондан санкцияларни олиб ташлашга чақирганди.

Ван Ининг сўзларига кўра, барча томонлар Афғонистоннинг ўзини тиклашига ёрдам бериш учун “Толибон” билан оқилона ва прагматик тарзда мулоқот ўрнатиши лозим.

Эслатиб ўтамиз, Теҳронда Афғонистонга қўшни мамлакатлар (Россия, Хитой, Эрон, Покистон, Тожикистон, Туркманистон, Ўзбекистон) учрашуви ўтказилмоқда.

Top