Jurnalist safar chog‘ida “Jibek Jolu-G‘ishtko‘prik”, “Oybek” o‘zbek-tojik chegara-bojxona posti hamda “Do‘stlik – Dostik” chegara-bojxona postlarida fuqarolar turli qiyinchiliklarga duch kelayotgani, chegarani qonuniy kesib o‘tayotganlardan pora olish hollari mavjudligiga bevosita guvoh bo‘ldi.
Tojikiston – 150-200 somoni
Uch mamlakat bilan bog‘lovchi chegara postlaridagi eng katta “stavka” Tojikiston chegarasida ekani ma'lum bo‘ldi. Tojikistonga o‘tmoqchi bo‘lgan o‘zbek fuqarolari kunduzi 2 marta – tushgacha bir marta va tushdan keyin bir marta o‘tkazilayotgani, neytral hududda 3 soatgacha kutishga majbur bo‘layotganlarini so‘zlashdi.
Tojikiston chegarasidagilar til biriktirgan holda o‘zbek fuqarosining har biridan 150-200 somoni (taxminan 150-200 ming o‘zbek so‘mi) pul olmoqdalar.
Buning uchun juda sodda, ammo inson ruhiyatiga salbiy ta'sir ko‘rsatuvchi, asabini buzuvchi usul tanlangan. Ya'ni o‘zbekistonliklar neytral hududda bir necha soat kutishga majbur qilinadi. Natijada darvoza oldida turgan chegarachi bilan kelishishdan, uning aytgan summasini berishdan o‘zga chorasi qolmaydi. Kelishilgan summa chegara postida faoliyat yurituvchi shifokorga beriladi.
Shifokorning “ko‘rigi”dan eson-omon o‘tdingizmi, demak, siz belgilangan summani bergansiz. Endi tojik chegarachi ham, bojxonachi ham sizga ko‘p ham e'tibor bermaydi. Hatto, bojxonachi yuklaringizni nomigagina bo‘lsin tekshiruvdan o‘tkazmaydi ham.
Qirg‘iziston – 50 ming o‘zbek so‘mi
Qirg‘izistonning “Dostik” postida esa chegaradan o‘tishga ruxsat berish 50 ming o‘zbek so‘mdan boshlanishi ma'lum bo‘ldi. Bu yerda ham cho‘ntakka urilayotgan “boj”ni olishda shifokor xizmatidan foydalanilmoqda.
Bizning holatimizda Islom Karimov nomidagi Toshkent xalqaro aeroportidagi laboratoriyada olingan koronavirusga PZR-test sertifikati o‘tmadi. Ya'ni qirg‘iz tomoni ro‘yxatida bu firma mavjud emas edi.
Ta'kidlash kerak, PZR sertifikatingiz bilan hammasi joyida bo‘lsa, endi chegarachining o‘zi sizni hech bir asossiz o‘tkazmasligini bildiradi. Neytral hududdagi panjara yonida qirg‘izistonlik chegarachi bilan sizning o‘rtangizda vositachi vazifasini o‘tovchi ham bor. U ochiq-oydin o‘tkazish summasini aytadi. Bu summa – yuksiz o‘tayotgan fuqaro uchun 50 ming so‘m.
