Zlatanning gollari «Milan»ni qutqarolmadi, Messi qahramonlik ko‘rsatdi, «MYu» 4ta gol o‘tkazdi

Angliya: «Chelsi»da himoyachi to‘purarlar

«Lester» — «Chelsi» — 0:3 (Ryudiger, 14. Kante, 28. Pulishich, 71).

Ko‘klar hamon Lukaku va Vernersiz o‘ynashda davom etmoqda, ammo londonliklarda hatto himoyachilar ham raqib darvozasi qarshisida dahshatli kuchga aylanishadi. Birinchi hujum chog‘ida mezbonlar darvozasi to‘siniga zarba yo‘llagan Chiluell ham bu haqda eslatdi. Ryudigerning goli esa — jamoa himoya chizig‘i vakillarining mavsum boshidan beri urgan 13-goli bo‘ldi va bu ko‘rsatkich APLning boshqa jamoalari himoyachilari urgan barcha gollardan ko‘proq. Bu epizodda «Chelsi» o‘zining kuchli tomonlarini namoyish etdi, «tulkilar» esa eng ojiz tomonini, Rodjyers shogirdlari bu mavsumda standart vaziyatlar vaqtida bosh bilan berilgan zarbalarni eng ko‘p o‘tkazib yubormoqda.

Lekin bu birgina epizod. Umuman olganda ham «Chelsi» raqibdan bir bosh yuqori ekanini ko‘rsatdi. Ikkinchi golli hujum ham bu ustunlik ifodasi edi, hujumni odatda raqib hujumlarini buzish bilan shug‘ullanadigan Kante a'lo darajadagi mahorat bilan yakunladi. Peshqadamlarga tanaffus yordam ko‘rsatgani yaqqol sezildi, tanaffus arafasida «Chelsi» autsayder «Byornli»ni mag‘lub etolmagandi. «Lester» esa Brendan Rodjyers «MYu»ga ketishi haqidagi xabarlarga chalg‘igandek o‘yin ko‘rsatmoqda, shotlandiyalik murabbiy esa hozircha bunday mish-mishlarni rad etmoqda.

«Uotford» — «Manchester Yunayted» — 4:1 (King, 28. Sarr, 44. Joau Pedru, 90+2. Dennis, 90+6 — van de Bek, 50).

Bu vaqtda «qizil iblislar»dagi inqiroz yanada chuqurlashmoqda, Ole Gunnar Sulsherga bosim ham kuchaymoqda. Norvegiyalik mutaxassis, albatta, muvaffaqiyatsizlik chog‘ida ham ijobiy so‘zlar topmoqda - u bosim futbolchilarni bor kuchi bilan o‘ynashga majbur qilayotganini aytmoqda. Ammo jamoadagi holat tashqaridan ham ko‘rinib turibdi, bosh murabbiyning matbuot anjumanidan keyin Lingard Instagram sahifasida «Vest Hem» formasida tushgan suratini joylashtirdi.

London klubiga ijaraga berilgan vaqtida ushbu yarimhimoyachi juda zo‘r o‘yinlar ko‘rsatgandi, ammo «MYu»ga qaytib u yana asosiy tarkibga kira olmadi. Van de Bek Sulsherni qutqarib qolganida g‘alati vaziyat yuzaga kelgan bo‘lardi — u Sulsher murabbiy bo‘lib qolayotganidan eng ko‘p jabr ko‘rayotgan futbolchidir. Zaxiradan o‘yinga qo‘shilgach, niderlandiyalik futbolchi juda yorqin o‘yin ko‘rsatdi va avval hisobni qisqartirdi, keyin sheriklari uchun bir necha bor vaziyatlar yaratdi, ammo uning ishtirokidagi kombinatsiya yakunida Krishtianu Ronaldu urgan gol ofsayd tufayli bekor qilindi.

Portugaliyalik futbolchi avvalroq gol urishi kerak edi, ammo birga bir vaziyatdan foydalana olmadi. Jamoa uchun yana bir sezilarli zarba Maguayrning chetlatilishi bo‘ldi, bir kishi kam bo‘lib qolgach, «qizil iblislar» o‘yinni qutqarib qolish uyoqda tursin, yirik hisobli mag‘lubiyatdan ham qochib qutula olmadi va qo‘shimcha daqiqalarda ikki gol o‘tkazib yubordi. Bu daqiqalarda De Xeaga achinish mumkin edi, u hisob hali 0:0 ekanida Sarrning penaltisini qaytargan, ammo to‘pga birinchi bo‘lib yetib kelgan Femini darvozani ishg‘ol qilgan, keyin bu vaziyatda raqib futbolchisi jarima maydoniga erta kirib ketgani uchun zarba qaytadan ijro etilgan va bu safar ham darvozabon zarba yo‘nalishini to‘sgandi.

O‘yin yakunida ma'lum bo‘ldiki, ispaniyalik posbon shunchaki halokat muddatini kechiktirgandi va endi Sulsher iste'foga chiqishiga hech kim shubha qilmayapti. O‘yindan keyin De Xea shunday dedi: «Murabbiy va personalni ayblash oson, ammo ba'zida aybdor futbolchilar bo‘ladi. «MYu» bugun ko‘rsatgan o‘yinga qarab odam uyaladi. Biz ko‘rsatgan bunday o‘yinga yo‘l qo‘yib bo‘lmaydi». Jamoaning boshqa bir futbolchisi Fernandesh esa maydondayoq murabbiyni himoya qilishni boshlagandi. Muxlislardan uzr so‘rash uchun borgan Sulsherga hushtakbozlik qilishdi, Fernandesh esa, bir odam emas, butun jamoa aybdorligini ko‘rsatib, futbolchilarga ishora qildi.

«Qizil iblislar» so‘nggi yetti turda birgina g‘alabaga erishdi. The Times ma'lumotiga ko‘ra, o‘yindan keyin onlayn rejimda «MYu» direktorlari kengashining shoshilinch yig‘ilishi o‘tkazilgan va unda murabbiyni ishdan bo‘shatish hamda unga tovon puli to‘lash masalasi muhokama etilgan. Boshqaruv a'zolarining ko‘pchilik qismi murabbiyni iste'foga chiqarish qarorini yoqlagan, ammo, Sky Spors ma'lumotiga ko‘ra, yakuniy qaror hali qabul qilinmadi.

Fransiya: Messi kamchilik bo‘lib qolgan parijliklarga g‘alabani olib berdi

«PSJ» — «Nant» — 3:1 (Mbappe, 2. Appia, 81, avtogol. Messi, 87 — Kolo-Muani, 76)

Barcha Messidan mo‘jiza kutayotgani tushunarli, ammo parijliklarning muammolari faqatgina argentinalik yulduzning tarkibga moslashishidagi murakkablik bilan bog‘liq emas. Avvallari — Unai Emeri davrida ham, Tomas Tuxel davrida ham — tezkor gol odatda «PSJ»ning ishonchli g‘alabasini ta'minlardi. Bu safargi o‘yinda ham Paredesning zarbasiga Mbappening oyoq qo‘yishi muvaffaqiyat debochasidek ko‘ringandi.

Favorit nafaqat bu ustunlikni oshira olmadi, balki o‘ziga o‘zi muammo tug‘dirib oldi. Markaziy himoyachi rolini ijro etishga qaror qilgan Keylor Navas oldinga chiqdi va Blasani jarima maydoniga kirishidan oldin yiqitdi. Mezbonlar bir kishi kam bo‘lib qoldi va bu «kanareykalar» javob goli urishiga olib keldi.

O‘yinda burilish nuqtasiga aylangan epizodda Messi oddiy uzatmani amalga oshirdi, ammo Appia uni to‘sishda muvaffaqiyatsiz harakat qilib, to‘pni o‘z darvozasi «to‘qqizligi»ga yo‘naltirdi, Lafont bunday trayektoriyada harakatlangan to‘pga yeta olmasdi.

Bu epizod argentinalik futbolchidagi muvaffaqiyatsizlik zanjirini uzdi, u «PSJ»ga kelganidan buyon faqat Chempionlar ligasida gol urgandi. Messi o‘yin oxirida o‘z uslubida yurish qilib, jarima maydoniga yaqinlashgan holda chap oyog‘i bilan kuchli zarba yo‘llab, ustunlikni oshirdi va «Nant»ni butunlay taslim qildi. Ligadagi ilk golini urgunicha Leo jami 21 zarba berishi talab etildi, shundan sakkiztasi darvoza sohasiga to‘g‘ri borgandi.

Italiya: Sarri «Yuventus»ga yutqazdi, Zlatan «Milan»ni qutqara olmadi

«Latsio» — «Yuventus» — 0:2 (Bonuchchi, 23, penaltidan, 83, penaltidan).

«Lokomotiv»ga qarshi o‘yin uchun Moskvaga safar qilish oldidan Mauritsio Sarri o‘zining sobiq klubi bilan uchrashdi, o‘zi uchun muhim bo‘lgan bu o‘yin arafasida murabbiy xotirjam bo‘lishga harakat qildi. U jurnalistlar unga «Yuventus»dagi davri muvaffaqiyatsiz kechganini eslatishlariga ishonchi komil bo‘lgan holda, skudetto qo‘lga kiritgani uchun turinliklardan minnatdorligi, Massimiliano Allegri bilan dushmanligi haqidagi gaplar — mifligini aytdi.

Ammo birinchi bo‘limdan keyin Sarri norozi qiyofada edi. Uning futbolchilari ham tanaffus arafasida Morataning yiqilishidan keyin qo‘yilgan penalti uchun arbitrga e'tirozlarini bildirishdi. Ammo nimanidir o‘zgartirishning iloji yo‘q edi, Bonuchchi hisobni ochgandi. Endi rimliklar ikkinchi bo‘limda o‘z kuchiga tayanishi kerak edi, ammo Immobile jarohat olgani tufayli «Latsio»da resurslar cheklangandi.

Bor imkoniyatlar bilan turinliklar himoyasini dog‘da qoldirish imkonsiz ekani ma'lum bo‘ldi. «Byankoneri»ning qarshi hujumi esa Kezaga jarima maydoni ichida qo‘pollik ishlatilishi bilan yakunlandi, nuqtaga yaqinlashgan Bonuchchi bu safar ham Reynaga imkoniyat qoldirmadi. Sardorning faoliyatidagi ilk dubli «Yuve»ga turnir jadvalida beshinchi o‘rindagi «Latsio» bilan ochkolar soni bo‘yicha tenglashib olish imkonini berdi.

«Fiorentina» — «Milan» — 4:3 (Dankan, 15. Saponara, 45+1. Vlahovich, 60, 85 — Ibrahimovich, 62, 67. Venuti, 90+6, avtogol)

Milanliklarning mavsumdagi ilk mag‘lubiyati oddiy bo‘lishi mumkin emasdi. Bunday o‘yinda nimadir ro‘y berishi kerak edi va bu — Teterushanuning qo‘pol xatosi edi. Burchak zarbasi ijro etilganida darvozabon xotirjamlik bilan to‘pga chiqib, uni tutib oldi va barcha u jamoasining tezkor qarshi hujumini boshlab berishiga tayyor edi. Ammo to‘p uning qo‘lidan sirg‘alib chiqib ketdi, himoyachilar to‘pni uzoqlashtirib yubora olmadi, Dankan esa himoyasiz qolgan darvozani ishg‘ol etdi.

Bu hodisa o‘yindagi jarayonning mantiqiy davom edi, «Milan» futbolchilari o‘yinning birinchi qismida to‘pni raqib jarima maydoni hududiga olib bora olishmadi, «fialki» esa raqibga bosimni daqiqa sayin oshirayotgandi. Bo‘limga qo‘shib berilgan daqiqalarda esa Saponara darvozaning uzoq «to‘qqizligi»ni aniq nishonga oldi. Ikkinchi bo‘limda Vlahovich qarshi hujumni gol bilan yakunlagach, o‘yindagi barcha masala hal bo‘lgandek ko‘ringandi.

Faqat shu kuni 40 yosh-u 48 kunlik bo‘lgan Ibrahimovich bunga rozi emasdi, u A seriya tarixidagi eng keksa dubl muallifi bo‘ldi va jamoani qutqarishi ham mumkin edi. Faqat Vlahovich bu mavsumda Zlatandan kuchliroq o‘ynamoqda. Ushbu serbiyalik barchasini o‘zi ijro etdi va intrigaga barham berdi. Qo‘shimcha daqiqalar so‘nggida Ibrahimovichning bosh bilan yo‘llagan zarbasi to‘sindan qaytib, avtogol ro‘y berganda esa o‘yinni qutqarishga kech bo‘lgandi. Agar «Napoli» yakshanba kuni «Inter»ga yutqazmasa, Luchano Spalletti Neapolga yakkapeshqadam bo‘lib qaytadi va uning jamoasi Yevropada mavsum boshidan buyon chempionat o‘yinlarida yutqazmayotgan yagona jamoa bo‘lib oladi.

«Atalanta» — «Spetsiya» — 5:2 (Pashalich, 18, 41. Sapata, 48, penaltidan. Muriel, 83. Malinovskiy, 89 — Nzola, 11, 90+1).

Aleksey Miranchuk yana o‘ynamadi va butun o‘yinni zaxira o‘rindig‘ida o‘tkazdi. Jan Pero Gasperini so‘nggi daqiqalarda, hisob yirik ko‘rinish olganida ham rossiyalik legionerni emas, yosh futbolchilarni maydonga tushirishga qaror qildi. Boshqalar esa o‘zini yaxshi tomondan ko‘rsatishdi. «Spetsiya»ga qarshi o‘yinda hujum chizig‘ining barcha vakillari nomini tabloga yozdirib qo‘ydi, Muriel nafaqat o‘zi gol urdi, balki Malinovskiyga assistentlik ham qildi.

YeChLga yo‘llanma beradigan kvartetdagi pozitsiyasini mustahkamlagan «Atalanta» qatorasiga olti turda mag‘lub bo‘lmadi. Shu bilan birga, shanba oqshomidagi g‘alaba — jamoaning 21 sentyabrdan buyon o‘z uyida ilk g‘alabasi bo‘ldi, shundan keyin jamoa «Milan»ga mag‘lub bo‘lgan va ikki o‘yinda durang o‘ynagandi.

Ispaniya: «Sevilya» yetakchilikni saqlab qoladimi?

«Sevilya» — «Alaves» — 2:2 (Okampos, 38. Rakitich, 90+2 — Laguardia, 5. Xoselu, 45+7, penaltidan).

Andalusiyaliklar kunni birinchi o‘rinda yakunlashdi, ammo ular mavjud vaziyatdan qoniqish hosil qilmayotgani tayin. Yakshanba kungi o‘yinlarda Xulen Lopetegi jamoasini «Real Sosedad» va «Real» quvib o‘tishi mumkin. Shu bilan birgalikda, qo‘shimcha daqiqalarda mag‘lubiyatdan qutulib qolgan «Sevilya» o‘z xarakteri bilan faxrlana olishi mumkin. Oqshom qahramoni Rakitich bo‘ldi, u 55 gol bilan la ligadagi eng sermahsul xorvatiyaliklar ro‘yxatida ikkinchi bo‘lib turibdi. Buni uning ampluasidan kelib chiqqan holda ajoyib natija deyish mumkin, u albatta, hisobida 113 gol bo‘lgan afsonaviy Shuker bilan raqobatlasha olmaydi.

«Atletiko» — «Osasuna» — 1:0 (Felipe, 87).

«Osasuna» — la ligadagi eng agressiv mehmon jamoa hisoblanadi. Bu jamoa mavsumni safar o‘yinlaridagi to‘rt g‘alaba bilan boshlagandi, shundan keyin «Santyago Bernabeu»da durang o‘ynab berdi va Benzemaning golli seriyasini to‘xtatdi. Ha, chempionatdagi tanaffus arafasida pamplonaliklar «Sevilya» maydonidan mag‘lub bo‘lib qaytishdi, ammo «Atletiko» bu naqadar jiddiy raqib ekanini hisobga olgan holda tayyorlanishi kerak edi. Amalda ham bu raqib faqat so‘nggi daqiqalarda taslim etildi - Felipe burchakdan to‘p uzatilganda hisobni ochdi. Ushbu braziliyalikdan tashqari g‘alabada darvozabon Oblakning hissasini ham e'tirof etmoq kerak, u Torresning burchakka yo‘naltirgan zarbasini qaytarib, g‘alabani saqlab qoldi, qolaversa, Diyego Simeone jamoasi barcha o‘yinlarda xarakter ko‘rsatib kelmoqda, mavsum boshidan buyon «matraschilar» 85-daqiqadan keyin urilgan gollar tufayli 7 ochko ishlashdi. Jamoa bu borada «Osasuna»dan ikki ochko ortda.

Germaniya: Dortmund «Bavariya»ga yaqinlashdi

«Augsburg» — «Bavariya» 2:1 (Pedersen, 23. Han, 35 – Levandovski, 38).
«Borussiya» D — «Shtutgart» — 2:1 (Malen, 56. Roys, 85 — Massimo, 63).

Intriga uchun har qanday ishora — Bundesligada bayram. Juma kuni «Bavariya» «Augsburg»ga sensatsion ravishda mag‘lub bo‘lgach, ko‘pchilik bundan xursand bo‘ldi, ayniqsa — Dortmunddagilar. «Borussiya» o‘z o‘yinida osonlik bilan g‘alaba qila olmadi, lekin yakunda «asalarilar» yetakchi bilan oradagi farqni bittagacha qisqartirishdi.

Marko Roze shogirdlari golsiz birinchi bo‘limdan keyin ikkinchi bo‘lim boshida tezkor gol urishdi, ammo hisobdagi ustunlik bir necha daqiqagina saqlanib turdi, ammo yakunda ajoyib qarshi hujum Roysning aniq zarbasi bilan g‘alaba keltirdi. Dortmundliklar o‘z sardorining harakatlari tufayli chempionatni o‘z tarixida ilk bor 7 uy uchrashuvidagi g‘alaba bilan boshlamoqda.

Kun statistikasi

• «Arsenal» darvozasiga APL o‘yinlarida 100-golini urgan ilk jamoa «Liverpul» bo‘ldi. Qizillar avvalroq «Nyukasl» (105) va «Tottenhem»ga (100) qarshi o‘yinlarda ham bunday nuqtadan o‘tishgandi.
• Menxengladbahning «Borussiya» jamoasi hujumchisi Shtindl faoliyatida ilk bor bir o‘yinda 3ta golli uzatmani amalga oshirdi.
• 9 yil va 324 kun davomida APLda gol urmagan himoyachi Henli qo‘shimcha daqiqalarda gol urib «Norvich»ga «Sauthempton» ustidan g‘alaba keltirdi.
• Turkiyaning amaldagi chempioni «Beshiktosh»da milliy birinchilikda 20 yildan buyon safar o‘yinlarida qatorasiga to‘rt mag‘lubiyatdan iborat seriya qayd etmagandi. Jamoa barcha turnirlar doirasida safar o‘yinlarida qatorasiga 6 mag‘lubiyat qayd etdi, ichki chempionatda peshqadamdan 10 ochko ortda qolib, yettinchi o‘rinda bormoqda.
• «Nyukasl» o‘zining sobiq futbolchilaridan 50-marta gol o‘tkazib yubordi. Yubiley zarba muallifi «Brentford» hujumchisi Toni bo‘ldi.
• «Byornli» hujumchisi Vud APLda 50-golini urdi, u turnir tarixidagi eng sermahsul yangizelandiyalik bo‘lib turibdi.