Maktabgacha va maktab ta’limi vazirligi hamda Mudofaa vazirligining 2025 yil 23 maydagi tegishli qo‘shma qarori bilan «Umumiy o‘rta ta’lim muassasalaridagi «Jasorat maktablari»ga o‘quvchilarni qabul qilish va o‘quv-tarbiyaviy jarayonni tashkil etish tartibi to‘g‘risida»gi nizom tasdiqlandi.
Unga ko‘ra, «Jasorat sinflari»da:
➖ o‘qish muddati yetti yildan (5 — 11-sinflar) iborat bo‘ladi;
➖ har yili 4-sinfni bitirgan 26 nafar o‘quvchi 5-sinf uchun tanlov asosida qabul qilinadi.
«Jasorat maktablari»ga kirish imtihonlari quyidagi tartibda o‘tadi:
➖ o‘qishga kirish uchun nomzod o‘quvchilarning hujjatlari ariza.piima.uz platformasida onlayn shaklda qabul qilinadi;
➖ o‘qishga kirish uchun kirish imtihonlari ikki (test hamda jismoniy) bosqichda amalga oshiriladi;
➖ test sinovlari o‘tkaziladigan fanlar bo‘yicha topshiriqlar spetsifikatsiyasi va baholash mezonlari Maktabgacha va maktab ta’limi vazirligi tomonidan har yili imtihon boshlanishidan bir oy oldin e’lon qilinadi;
➖ test sinovlari ona tili va matematika fanlaridan tashkil etiladi;
➖ kirish imtihonlarining yakuniy natijalari har yili avgust oyida vazirlik va Jasorat maktablarining rasmiy veb-saytlarida e’lon qilinadi.
«Jasorat sinflari»da ta’lim jarayonlari quyidagicha olib boriladi:
➖ ta’lim jarayonlari 5-11- sinflarda kunduzgi ta’lim shaklida, umumiy o‘rta ta’lim muassasalari uchun belgilangan davlat ta’lim standartlariga muvofiq amalga oshiriladi;
➖ matematika, ChQBT, tarix, jismoniy tarbiya, chet tili, fizika fanlari chuqurlashtirilgan holda o‘qitiladi;
➖ o‘quv yili davomida ikki marta harbiy poligonlarda, har chorakda bir marta harbiy qismlarda amaliy mashg‘ulotlar olib boriladi;
➖ 9-sinfni yakunlagan o‘quvchilarga tayanch o‘rta ta’lim to‘g‘risidagi shahodatnoma, 11-sinfni tamomlagan o‘quvchilarga umumiy o‘rta ta’lim to‘g‘risida shahodatnoma beriladi.
«Jasorat maktablari»ni bitirgan o‘quvchilarga imtiyozlar:
➖ a’lo baholar bilan tamomlagan hamda «Vatan tayanchi» otryadining a’zosi bo‘lgan bir nafar o‘quvchiga Mudofaa vazirligi tomonidan oliy harbiy va harbiylashtirilgan hamda yuridik ta’lim muassasalariga o‘qishga kirish uchun imtiyozli tavsiyanoma beriladi.
