Qirg‘izistonda ilk milliy avtomobilni ishlab chiqarishni boshlash ortga surildi

Kompaniya sertifikatlashtirish jarayonini yakunlay olmagani uchun mashinalarni ishlab chiqarishning imkoni bo‘lmayapti.

Kami Nimble elektr yuk avtomobillari ishlab chiqarishni o‘tgan yil noyabrda boshlash rejalashtirilgan, ammo keyin 2022 yilga surilgandi.

Hozirda sertifikat sinovlari uchun bir necha dona avtomobil ishlab chiqarilgan.

«Hozirda mashina Belarusda transport vositasi sifatida ma’qullanishi uchun attestatsiyadan o‘tkazilmoqda. Jarayon qachon yakunlanishini ayta olmayman», — dedi Kami Motors vakili Riskeldi Asqarov.

Uning so‘zlariga ko‘ra, sertifikatlashtirish jarayoni pandemiya cheklovlari va qish mavsumi boshlangani sababli cho‘zilib ketgan.

Asqarovning aytishicha, Kami Nimble avtomobillarini ishlab chiqarish bu yil aniq boshlanadi. Kompaniya saytida 2022 yil 31 dekabr buyurtmachilarga dastlabki 100ta mashinani yetkazib berishning oxirgi muddati sifatida ko‘rsatilgan.