11:24 / 26.07.2022
18175
АҚШ вакили музлатилган пуллар бўйича мулоқот бошлаш шартларини билдирди

АҚШ «Толибон» аввалги хатоларини такрорламаслиги кераклигини талаб қилмоқда.

Фото: Kun.uz

АҚШнинг Афғонистон бўйича махсус вакили Том Уэст Америка томони музлатилган пулларни қайтариш бўйича «Толибон» билан мулоқотга киришишга тайёрлигини маълум қилди.

«Биз барқарор ва ривожланаётган Афғонистонни кўришни хоҳлаймиз. Аҳоли барча ҳуқуқларидан фойдалана олсин.

Гарчи ИШИДга қарши ҳаракатлар бўлаётган бўлса-да, биз ҳамон баъзи таҳдидларни кўряпмиз.

Биз айниқса, аёллар ва болалар ҳуқуқларини ҳимоя қилишга чақирамиз. Ҳукумат барчага очиқ бўлиши тарафдоримиз. Шунингдек, гуманитар ёрдам учун имкон бериш керак, эркин фикр билдириш ҳамда эркинлик ҳуқуқи таъминланиши керак.

«Толибон» аввалги хатоларини такрорламаслиги керак. Афғонистонни ўз мажбуриятларини бажаришга чақирамиз.

Тушунамизки, қиш яқинлашиб келмоқда ва бу гуманитар инқирозга сабаб бўлиши мумкин. Биз афғон халқи қийналмаслиги учун ёрдам берамиз, энг йирик донор бўлиб қоламиз.

Бундан ташқари, ҳукумат иқтисодий ривожланиш учун тўсиқлар қўймаслиги керак. Музлатилган пуллар бўйича ҳам мулоқотга киришишга тайёрмиз. Бу борада бирга ишлаймиз. Бу активлар иқтисодни тиклаш учун ишлатилиши керак ҳамда шаффоф молиявий сиёсат олиб борилиши керак», дея АҚШ махсус вакилининг сўзларини келтирмоқда Kun.uz мухбири.

 

Top