«Issiqlik uchun kommunal to‘lovlar oshmaydi» – Fransiya kompaniyasi Toshkentda issiqlik tizimini o‘zgartirishni boshladi

Fransiyaning Veolia kompaniyasi 2022 yilning iyul oyidan boshlab Toshkentdagi issiqlik tizimini boshqara boshladi. Kompaniya 3 oylik ishi davomida 1600 dan ortiq nosozliklarni aniqlab, bartaraf etgan. Veolia Tashkent mas’ullari Kun.uz bilan suhbatda modernizatsiyadan keyin kommunal to‘lovlar oshmasligi, aksincha bir qancha yaxshilanishlar kutilayotganini ma’lum qildi. Kelgusida barcha binolarning isitish tizimi alohida bo‘ladi, issiq suv sifati yaxshilanadi va quvurlar korroziyasi kamayadi. Mutaxassislar issiqlik energiyasining birlik xarajatlarini ham kamaytirmoqchi.

Fransuz kompaniyasi Toshkentda issiqlik tizimini yaxshilaydi

2022 yil 1 iyuldan Fransiyaning Veolia kompaniyasi Veolia Energy Tashkent MChJ shu’ba kompaniyasi orqali Toshkent shahrining issiqlik ta’minoti tizimini boshqarishni boshladi. 2021 yil 29 sentabrdagi davlat-xususiy sheriklik to‘g‘risidagi bitimga binoan boshqaruv 30 yil muddatga berilgan.

Bu davrda kompaniya poytaxtdagi issiqlik infratuzilmasini yangilaydi va aholiga issiqlik yetkazib beradi.

Jurnalist va blogerlar uchun tashkil qilingan press-turda o‘zgarishlar va rejalar haqida batafsil ma’lumot berildi.

Veolia Energy Tashkent bosh direktori Aleksandr Xasti Kun.uz muxbiri bilan suhbatda poytaxtdagi issiqlik tizimining 3 oylik o‘rganishdan keyingi xulosalarini aytar ekan, modernizatsiya va tizimga kiritilgan investitsiya uchun aholiga issiqlik tizimi (issiq suv va kuz-qishda isitish) kommunal to‘lovlar oshirilmasligini ma’lum qildi.

«Kommunal to‘lovlar o‘tgan yilgi narxda o‘zgarishsiz qoladi. Kelajakda biz narxlar oshishiga hissa qo‘shib kelgan tizimdagi yo‘qotishlar oldini olamiz va xarajatlarni kamaytirishga erishamiz.

Loyihaning boshidan boshlab biz tushundikki, tizimni modernizatsiya qilish va uni yaxshilash investitsiya talab qiladi, shu sababli bu xarajatlar subsidiyalar orqali qoplanadi», – dedi u.

Kompaniya tomonidan berilgan ma’lumotlarga ko‘ra, tariflar keskin oshib ketishining oldini olish maqsadida aholiga pasaytirilgan tariflarni qo‘llash va ko‘riladigan zararlarni qoplash uchun Toshkent shahar budjetidan 2021-2027 yillarda 8,4 trln so‘m subsidiya ajratiladi.

Shuningdek, Aleksandr Xasti tizimdagi kamchiliklar darajasi 50 foizga yetishini ta’kidladi. 

«Bu tizim samarasizligini anglatadi. Yetkazib berilayotgan issiqlik yetarli darajada yuqori emas, natijada ko‘plab xonadonlar issiqlik borasida noqulayliklarga uchraydi. Ularga issiqlik yetib kelgunicha kutishiga to‘g‘ri keladi. Chunki binolarga issiqlik yetib borguncha yo‘lda yo‘qotishlarga uchraydi, buning sababi esa tizim juda sust ishlashida. Loyiha davomida bu kamchiliklar bartaraf etiladi. Ammo ular bir yilda yechiladigan muammolar emas», – dedi u. 

Uning so‘zlariga ko‘ra, boshqa davlatlar bilan solishtirganda bir haftadagi tizimdagi avariyalar boshqa davlatlardagi bir yillik avariyalarga teng va bu juda ham xavotirli.

Kompaniya mutaxassislari tomonidan 20 ta eng yirik qozonxonada infratuzilmadagi nuqsonlarni aniqlash bo‘yicha dastlabki audit o‘tkazilgan. Toshkent shahridagi qolgan qozonxonalarni tekshirish ishlari davom etmoqda.

«Audit shuni ko‘rsatdiki, keng ko‘lamli takomillashtirishni talab qiladigan favqulodda holatdagi qismlar – bu infratuzilmaning ayni holatidir. Issiqlik tarmoqlari va jihozlarining salmoqli qismi joriy va kapital ta’mirga muhtoj. Birdaniga butun infratuzilmani almashtirib, mavjud muammolarni hal qilish esa imkonsiz.

Veolia Energy Tashkent eskirgan quvurlarni almashtirish, butun issiqlik ta’minoti tizimini modernizatsiya qilish bo‘yicha ishlarni amalga oshirmoqda. Uch oy ichida biz 100 dan ortiq hududda issiqlik tarmoqlarini ko‘chirishni yakunladik, shuningdek, quvurlar deformatsiyasining oldini oluvchi mingdan ortiq kompensatorlarni ta’mirladik va almashtirdik», – deya izoh berdi Veolia Energy Tashkent kompaniyasining operatsion masalalar bo‘yicha direktori Laurinas Rarivanas.

Press-turning ikkinchi qismida OAV xodimlari kompaniya tomonidan ta’mirlanadigan yirik obektlardan biri – Mirzo Ulug‘bek tumanida joylashgan issiqlik markazlaridan birida bo‘ldi. Markazda 405 ta katta bino bor, shulardan 300 xonadonga issiqlik yetkazib beriladi. Ikki oy ichida audit o‘tkazilgan. Markaz elektr energiya va gazdan tejamkor foydalanish texnologiyasiga o‘tkaziladi.

Mirzo Ulug‘bek tumanining deyarli yarmini issiqlik bilan ta’minlovchi qozonxona o‘tgan asrning 80-yillarida qurilgan. Infratuzilma eskirgan, boshqaruv tizimi ham eski texnologiyalar bilan amalga oshiriladi. Kelgusida Veolia Energy Tashkent kompaniyasi bu yerda modernizatsiya ishlarini olib boradi.

Madina Ochilova tayyorladi