AQSh Sohil qo‘riqlash xizmati xabariga ko‘ra, Kanadaning Horizon Arctic kemasi tomonidan suvga tushirilgan Odysseus suvosti apparati 3800 metr chuqurlikda yotgan «Titanik» burnidan taxminan 500 metr masofada (1600 fut) batiskafning quyruq konusini, shuningdek korpusning boshqa qismlarini topgan.
Parchalarning holati halokatli vayrongarchilikdan darak bermoqda, ammo uning sababi noma’lum. Shuningdek, qurbonlarning jasadlarini topish mumkinligi ham aniq emas.
«Bu nihoyatda og‘ir sharoit», – deya ma’lum qildi Bostondagi matbuot anjumanida AQSh Sohil qo‘riqlash xizmati kontr-admirali Jon Moger.
«Titan»ga egalik qilgan OceanGate kompaniyasi ham ekipaj halok bo‘lganini tan olib bayonot bergan.
«Bu odamlar o‘ziga xos sarguzashtlar ruhi hamda jahon okeanlarini o‘rganish va himoya qilishga bo‘lgan chuqur ishtiyoq birlashtirgan haqiqiy tadqiqotchilar edi», – deyilgan bayonotda.
Wall Street Journal rasmiy manbaga asoslanib xabar berishicha, AQSh harbiy-dengiz kuchlarining dushman suvosti kemalarini qidirishga mo‘ljallangan maxfiy akustik aniqlash tizimi batiskaf suvga sho‘ng‘ishni boshlaganidan bir necha soat o‘tganidan keyin submarina portlashini qayd etgan.
«AQSh harbiy-dengiz kuchlari akustik ma’lumotlarni tahlil qildi va aloqa uzilgan paytda «Titan» suvosti apparati ishlayotgan joyga yaqin nuqtada portlash bilan bog‘liq anomaliyani aniqladi», — degan WSJ muxbiriga AQSh dengiz floti vakili.
AQSh mudofaa vazirligidagi manbaga ko‘ra, «Titan» Polar Prince bilan aloqani yo‘qotgan vaqtda harbiy-dengiz floti avariya hududini eshita boshlagan. Ko‘p o‘tmay akustik tizim keyinchalik suvosti bo‘laklari topilgan hududda ikkita portlash ovozini yozib olgan.
Polar Prince tadqiqot kemasi «Titan»ni 110 yil muqaddam «Titanik» kemasi cho‘kib ketgan joyga yakshanbaga o‘tar kechasi olib borgandi.
Batiskaf tongda sho‘ng‘ishni boshlaydi, ammo suv yuzasidagilar missiya boshlanganidan 1 soat-u 45 daqiqa o‘tib u bilan aloqani yo‘qotadi.
Polar Prince ekipaji «Titan» bilan aloqa uzilib qolgani haqida AQSh Sohil qo‘riqlash xizmatini darhol xabardor qilmaydi: ularga taxminan sakkiz soat o‘tib xabar beriladi. Shundan keyin idoraning Bostondagi qo‘mondonlik markazida qidiruv amaliyotini muvofiqlashtirish boshlanadi, unda bir necha mamlakat vakillari ishtirok etadi.
