Surxondaryoda bankda amaliyot o‘tayotgan ikki talaba jinoyatga qo‘l urdi

IIVning ma’lum qilishicha, Termiz shahrining Tuproqqo‘rg‘on mahallasida yashovchi fuqaro “102” xizmatiga qo‘ng‘iroq qilib, noma’lum shaxslar bank kartasidan ilova orqali 75 mln 700 ming so‘m pulni yechib olganini bildirgan. Surxondaryo viloyati IIB Tezkor-qidiruv xizmati Kiberxavfsizlik bo‘limi xodimlari tomonidan olib borilgan tezkor surishtiruv ishlari natijasida ushbu jinoyatni tijorat banklaridan biriga amaliyot o‘tash uchun borgan ikki talaba sodir qilgani aniqlangan.

Talabalar amaliyot davrida bankning barcha sirlarini o‘rganib borishgan. So‘ngra o‘zaro kelishib, tanishining nomiga telefon raqami rasmiylashtirgan hamda uning telefonidan foydalangan holda bank xodimlarini aldab, turli amaliyotlarni bajarishgan. Jumladan, fuqaroning 75 mln 700 ming so‘m pulini o‘g‘irlashgan. O‘g‘irlangan pullar Termiz shahrida joylashgan bankomatlardan naqdlashtirilgan.  

Gumonlanuvchilar qisqa fursatda aniqlanib, ulardan telefon apparatlari, ko‘plab bank kartalari, shuningdek, ulardan biri onasiga berib yuborgan 59,8 mln so‘m miqdoridagi pul hujjatlashtirib olingan.

Holat yuzasidan jinoyat ishi qo‘zg‘atilib, to‘plangan hujjatlar sudga yuborilgan. Sud hukmiga ko‘ra amaliyotchi talabalar Jinoyat kodeksining 169-moddasi (o‘g‘rilik) bilan aybli deb topilgan va ulardan biriga 2 yil 3 oy, ikkinchisiga esa 2 yil muddatga ozodlikdan mahrum qilish jazosi tayinlangan.

Oldinroq Buxoroda bank xodimi 41 kishining bank kartasidan pul o‘g‘irlab, o‘z ehtiyojlari uchun ishlatib yuborgani aniqlangandi.