Xo‘ja Nasriddin haqida kompyuter o‘yini yaratiladi 

Samarqandda bo‘lib o‘tayotgan «O‘zbekiston madaniy merosi – yangi Renessans davri poydevori» xalqaro kongressida prodyuser va rejissyor Timur Bekmambetov Xo‘ja Nasriddin haqidagi loyihasini taqdim etdi. 

Bekmambetov so‘zlariga ko‘ra, Xo‘ja Nasriddin haqidagi loyiha ko‘p formatli. Gap birinchi navbatda to‘liq metrajli animatsion filmini yaratish haqida ketmoqda. Quvnoq faylasuf haqida animatsion serial va kompyuter o‘yini ham rejalashtirilgan. 

Qayd etilishicha, «Xo‘ja Nasriddin» multfilmi Unreal Engine 5 dvigatelida yaratilgan birinchi animatsion loyiha bo‘ladi.

Loyiha Bazelevs studiyasi va Firdavs Abduxoliqov rahbarligidagi O‘zbekiston Kinematografiya agentligi tomonidan amalga oshirilmoqda. 

Multfilm yaratish ustida Timur Bekmambetovning O‘zbekistondagi, Rossiyaning Almetevsk va Turkiyaning Anqaradagi animatsion studiyalari ishlayapti. 

Bekmambetov ta’kidlaganidek, Xo‘ja Nasriddin haqidagi loyihani nafaqat donishmand o‘zining sevimli qahramonlaridan biri bo‘lgani uchun, balki bunday ko‘rsatmalarni ustozi Rezo Gabriadze bergani uchun ham amalga oshirmoqda.