«Arsenal» poygadan chiqmoqda, «Barselona» revansh oldi. Kun o‘yinlari
|17:35 / 23.02.202514 09824 min
«Arsenal» «Liverpul»dagi pasayishdan foydalana olmadi, «MYu» 0:2 hisobidan chiqib ketdi, «Barselona» qiyin o‘yinda VAR yordamida g‘alabani saqlab qoldi. Shanba oqshomida Yevropa futbolida ro‘y bergan asosiy voqealar, o‘yinlardagi gollar va turnir jadvallaridagi vaziyat.
Inqiroz holatidagi «MYu» «Everton»ga qarshi o‘yin oldidan turnir jadvalida ushbu raqibdan pastda edi. O‘yindan keyin ham bu holat o‘zgarmadi. Mersisaydliklar Devid Moyyes boshqaruvida kuchli oraliqni o‘tkazmoqda. Yaqinda «Gudison Park»da «Liverpul» g‘alabaga erisha olmagandi (2:2), endi «irislar» «qizil iblislar» darvozasiga birinchi bo‘limdayoqi ikkita gol urdi, mehmonlar mudofaasi Betuga qarshi chora topa olmadi. Avvaliga — burchak zarbasidan keyin to‘p jarima maydonida ushlanib qoldi va ushbu forvard to‘pga yakuniy zarbani berdi. Keyin esa Betu qarshi hujumda Harrisonni to‘p bilan ta’minladi, u esa Maguayrni aldab o‘tib zarba berdi. Onana uning zarbasini to‘sdi, ammo qaytgan to‘pga birinchi bo‘lib Dukure yetib keldi.
Tanaffusgacha 2:0 hisobidan keyin «Yunayted» muxlislarida amalda mag‘lubiyatdan qutulib qolish umidi yo‘q edi, ammo bu safar Ruben Amorim shogirdlaridan qisman rozi bo‘lishi mumkin. Uning jamoasi ikkinchi bo‘limda burilish yasadi va o‘yinning oxirgi qismini juda yorqin o‘tkazdi, bu daqiqalarda Brunu Fernandesh o‘zini ko‘rsatdi. Sardor avvaliga jarima zarbasidan chiroyli gol urdi, «iblislar» APLda oxirgi marta 2022 yil aprelida, Krishtianu Ronalduning zarbasi bilan shunday gol urishgandi. Keyingi standartda — Brununing uzatmasidan keyin — Ugarte hisobni tenglashtirdi. Va hisob 2:2 holatida Pikford Fernandeshning zarbasidan keyin to‘sin ostiga borayotgan to‘pni qaytarib qoldi.
Bunday ssenariyda «MYu» navbatdagi mag‘lubiyatini qabul qilishini tasavvur qilish qiyin edi. Holbuki bunday ehtimol ham yuzaga keldi, chunki qo‘shimcha daqiqalarda — Onananing yana bir ajoyib seyvidan keyin — jarima maydoni ichida «Yunayted»ning shonli davrlaridagi sobiq futbolchisi Eshli Yang gazonga quladi. Bosh hakam avvaliga 11 metrlik nuqtani ko‘rsatgandi, lekin videotakrorda faxriy futbolchi aktyorlik san’atini namoyish etgani ko‘rinib qoldi va monitorga borgan referi o‘z qarorini o‘zgartirdi. Adolat g‘alaba qozondi, psixologiya nuqtayi nazaridan bu durang «MYu» uchun amalda g‘alabaga teng bo‘ldi.
«Arsenal» so‘nggi vaqtlarda barqaror emas. Avval «Manchester Siti»ni yirik hisobda tor-mor etdi (5:1), keyin «Nyukasl» mag‘lub bo‘lib (0:2) Angliya ligasi kubogini tark etdi. Jamoa hujum chizig‘ida ulkan muammolar yuzaga kelgan, jamoada amalda nominal forvard yo‘q. O‘tgan turda Lesterga qarshi o‘yinda raqib tayanch yarimhimoyachisi Merinoni hujum markaziga tashlash orqali g‘alabaga erishilgandi. Ammo autsayderni Grem Potter boshqaruvida jonlana boshlagan «Vest Hem» bilan solishtirib bo‘lmaydi. Shanba kuni «bolg‘achilar» himoyada sifatli harakatlandi, birinchi bo‘lim oxirida esa «kanonirlar»ni qarshi hujumda jazoladi.
Van-Bissaka qanotda Kalafioridan ustun keldi, uning jarima maydoniga uzatmasidan keyin esa mezbonlarning ikki himoyachisi dog‘da qoldyui. Aniqrog‘i ular bir-biriga ishonib qoldi va bundan Bouen foydalanib ketdi. U endi Antoniodan keyin «Vest Hem»ning APLda 50 ta gol urgan ikkinchi futbolchisi bo‘ldi. Ikkinchi bo‘lim o‘rtalarida Mikel Artetaning muammolari yanada ortdi. Kalafiorining o‘rniga tushirilgan 18 yoshli Lyuis-Skelli maydon markazida to‘p uchun kurashda Quddusni yiqitdi.
Muammo shundaki, londonliklarning boshqa bir himoyachisi yosh sherigi bilan bir chiziqda turgan bo‘lsa-da, narigi qanotga yaqinroq joylashgandi va u raqibga yetib olishi dargumon edi. Darvozabon Rayya esa darvozasidan taxminan 35 metr masofaga uzoqqa chiqib ketgandi. Shunday ekan, avvaliga sariq kartochka ko‘rsatgan hakam monitorga borganidan keyin qarorini o‘zgartirib, mezbonlar futbolchisini maydondan chetlatdi. Bu «Arsenal» futbolchilari uchun joriy mavsumdagi beshinchi qizil kartochka bo‘ldi. Shu tariqa, «kanonirlar» «Liverpul» bilan oradagi farqni qisqartirib olish imkoniyatidan foydalana olmadi va amalda chempionlik uchun kurashdan chiqdi. «Bu APLda kerak bo‘lgan darajadan pastroq», — dedi o‘yindan keyin Arteta. Potter esa faoliyatida «Emireyts»dagi besh o‘yindan to‘rtinchi g‘alabasini nishonladi. U «Arsenal» maydonidagi g‘alabalar foizi bo‘yicha peshqadam, son bo‘yicha faqat Xosep Gvardiola (8) va Yurgen Klopp (6)dan ortda.
Asosiy futbolchilar sog‘ayib, formaga kirib borishi bilan «Tottenhem» ham asta-sekin o‘ziga kelmoqda. «Shporlar» o‘zining haqiqiy kuchini Ipsvichdagi uchrashuv ko‘rsatdi, u yerda birinchi bo‘lim o‘rtalarida Jonson Son Hyong Min yordamida ikki gol urdi. Keyin hisob qisqardi va bir muncha vaqt vaziyat qaltis bo‘lib turdi, ammo o‘yin oxirida Angelos Postekogluni yoshlarning faxriylar bilan uyg‘unlikdagi harakatlari mamnun qildi. Meddison Spensga APLdagi ilk golini urishga yordam berdi, zaxiradan maydonga tushgan Skarlett esa Kulushevskiga assistentlik qildi. Shu tariqa, «Tottenhem» mavsumda ilk bor chempionatda ketma-ket uch o‘yinda g‘alaba qozondi.
«Chelsi»ning yaqinda Enso Mareska tilga olgan YeChLga qaytish orzulari quyosh tig‘idagi qor kabi erib bormoqda. Odatdagidan farqli o‘laroq Enso Fernandesning goli ham g‘alabani ta’minlay olmadi. To‘qqizinchi daqiqadayoq argentinalik hujumchi tezkor qarshi hujumga qo‘shilgan va Pedru Netuning qanotdan uzatmasini golga aylantirgandi. Ammo bu safar londonliklar hisobdagi ustunlikni saqlab qololmadi. «Chelsi» bu mavsumda to‘rtinchi marta tanaffusga qadar hisobda oldinda borgan o‘yinlarida g‘alabaga erisholmadi (=2-2).
Jamoa o‘yiniga birinchi bo‘limda himoyachi Chaloba jarohat olgani ham ta’sir ko‘rsatgan bo‘lishi mumkin. Ammo «Aston Villa» ham xuddi shu sabab tufayli Mingzni yo‘qotdi. Faqat Unai Emeri ixtiyorida nisbatan sifatli zaxira o‘rindig‘i bor va ikkinchi bo‘limda qishda olib kelingan futbolchilar o‘yinni o‘zgartirishdi. Avvaliga rikoshetdan foydalanib to‘pga ega chiqqan Reshford uni bo‘sh darvoza qarshisiga yumalatib berdi, so‘nggi daqiqalarda esa Markus yana bir bor Asensioning goliga hammualliflik qildi, g‘alaba golida londonliklar darvozaboni Yorgensenning qo‘pol xatosi ham muhim rol o‘ynadi. Birinchi davrada chempionlik uchun kurashib ko‘rgan «Chelsi» endi oltinchi o‘rinda qolmoqda, «Villa» esa bir ochkolik farq bilan ta’qib eta boshladi.
Chempionlik poygasidagi birinchi qadamni «Atletiko» tashladi va madridliklar buni ishonch bilan amalga oshirib, «Valensiya» sardori Gayyaning la ligadagi yubiley 300-o‘yinini barbod qildi. «Ko‘rshapalaklar» jamoasi afsonasiga havas qilib bo‘lmasdi, chunki uning jamoasi chuqur inqirozga tushib qolgan va top-klublarga raqobat qiladigan holatda emas. Birinchi gol jamoalar darajasidagi farqni yaqqol ko‘rsatib berdi, unda asosiy ishni Grizmann bajardi. Uning himoyachilar ortiga oshirgan zargarona pasidan keyin Samuel Lino gol urishi kerak edi, ammo uning darvozabon bilan yakkama-yakka vaziyatda yo‘llagan zarbasi to‘singa tegdi.
Ammo bunday yaxshi pas bekor ketmadi va qaytgan to‘pga birinchi bo‘lib Jovanni Simeone yetib keldi va u to‘pni qulay vaziyatdagi Xulian Alvaresga tashlab berdi. Keyin esa argentinalik to‘purar va Grizmann boshqa futbolchilar ishtirokisiz ikkinchi golni urishdi, bu vaziyatda fransuz futbolchisi to‘pni jarima maydoni markaziga yetkazib berdi. O‘yin oxirida esa zaxira o‘rindig‘i qiroli Korrea mezbonlarni uzil-kesil taslim qildi. Bu Anxelning la ligada joker rolidagi 24-goli bo‘ldi va u bu ko‘rsatkich borasida turnir tarixida to‘rtinchi o‘ringa ko‘tarildi.
Korrea bu ro‘yxatda Valter Pandianini ortda qoldirdi. Keyingi mo‘ljal — 27 tadan gol urgan de Paul va Messiga yetib olish, birinchi o‘rinda esa o‘tgan mavsum yakunida butsalarini mixga ilgan «Jirona»ning 38 yoshli faxriysi Stuani (29 gol) joylashgan. Bu g‘alabadan keyin Diyego Simeone jamoasi kamida bir necha soatga turnir jadvalida birinchi o‘ringa chiqib oldi va raqobatchilari xatosini kuta boshladi.
Mantiqan qaraganda, madridliklar «Barselona»dan sovg‘a kutishi qiyin edi, ammo o‘tgan turda ko‘k-anorranglilar «Rayo Valekano» bilan o‘yinda qiyinchilikka uchrab, bazo‘r minimal ustunlik erishgandi (1:0). «Las-Palmas» esa noyabr oyi oxirida Hans-Diter Flik shogirdlarini to‘xtatgandi (1:2). Umuman olganda, kataloniyaliklarda bu mavsum jadvalning ikkinchi yarmidagi raqiblar bilan muammolar surunkali tus olgan va bu o‘yin debyutida quyi ligaga tushib ketmaslik uchun kurashayotgan «Las-Palmas» tezkor gol bilan peshqadamni shoshirib qo‘yishiga bir baxya qoldi. Favoritlar esa birinchi bo‘lim davomida yaqqol vaziyat yarata olmadi.
Flik tanaffusdayoq Fermin Lopes o‘rniga Dani Olmoni tushirishga qaror qildi va bu o‘zini oqladi. O‘yin taqdirini Yevropa chempionlari hal etishdi. Olmo hujumni boshlab berdi va raqib jarima maydoniga otilib kirib, Yamalning uzatmasiga ochildi. Keyin o‘z mahoratini namoyish etib, dribling bilan himoyachini yo‘ldan oldi va to‘sin ostiga qaytarib bo‘lmas kuchli zarba yo‘lladi. Ammo bu hal qiluvchi vaziyat emasdi. Ko‘p o‘tmay «Barsa» jarima maydonidagi epizoddan keyin o‘yindagi keskinlik eng yuqori cho‘qqisiga chiqdi - arbitr vaziyatni qaytadan ko‘rish uchun monitor qarshisiga bordi.
Ammo Erik Garsiya jarima maydoni ichida to‘pni qo‘l bilan to‘xtatib qolgan bo‘lsa-da, hal qiluvchi omil hujum davomidagi ofsayd holati bo‘ldi.
Hakamning yakuniy qaroridan keyin Rafinya xuddi gol urgandek xursandchilik qildi, braziliyalik vingerning hissiyotlari shu bilan cheklanmadi va qo‘shimcha daqiqalarda Ferran Torresga assistentlik qildi. Zaxiradan tushgan hujumchi kuchli pasdan keyin bir teginishda to‘pni o‘ziga bo‘ysundirdi, ikkinchi teginishda intrigaga butkul barham berdi. Yil boshidan buyon biror marta mag‘lub bo‘lmagan «Barsa» birinchi o‘ringa qaytdi. Yakshanba kuni — «Real» «Jirona» bilan o‘yinda o‘z yurishini amalga oshiradi.
Italiya: Menyanda kulgili xato va Lautaroning seriyasi
Italiyada shanba kuni syurpriz bilan boshlandi — «Latsio» Venetsiyada golsiz durang qayd etdi. Rimliklar xavfli zonadagi jamoani mag‘lub etolmaganidan «Yuventus» foydalanib qolishi mumkin, turinliklar yakshanba kuni «Kalyari» ustidan g‘alaba qozonsa, to‘rtinchi o‘ringa chiqishi va Chempionlar ligasini erta tark etganini qisman yuvishi mumkin.
«Milan» esa asosiy yevrokubokdagi fiaskodan keyin ham cho‘kishda davom etmoqda. YeChLda ham ishonchli o‘yin ko‘rsata olmagan Menyan ichki chempionatda ham uyaltirmoqda. Yaqingacha A seriyaning eng yaxshi darvozaboni sanalgan fransuz o‘ta qo‘pol xatoga yo‘l qo‘ydi: u mavsumning eng kulgili gollari kolleksiyasini to‘ldirdi. Raqibning oddiy uzatmasidan keyin jarima maydonini tashlab chiqqan darvozabon to‘pni uzoqlashtirish o‘rniga uni jamoadoshi Tshauning ko‘ksiga qarata tepdi va bu avtogolga aylandi. Malik o‘zi istamagan holda mavsumda ikkinchi bor o‘z jamoasi darvozasini ishg‘ol etib qo‘ydi.
Shanba kungi muammolar kulgili xato bilan cheklanib qolmadi. Pulishich shu kuni fantastik o‘yin ko‘rsatgan Vanya Milinkovich-Savich bilan duelda penaltini golga aylantira olmadi. Bu yilgi chempionatda serbiyalik posbon o‘z darvozasiga qo‘yilgan beshta penaltidan to‘rttasini qaytargan. Bu nafaqat A Seriyadagi, balki Yevropaning kuchli beshlik chempionatlaridagi maksimal ko‘rsatkichdir. Menyan ham o‘z aybini yuvishga urinib, birinchi bo‘limda seyvlari bilan «Milan» taslim bo‘lishiga yo‘l qo‘ymadi, ammo Reyndersning hisobni tenglashtirgan golidan ikki daqiqa o‘tib amalga oshirilgan javob hujumida qutqara olmadi. Litvalik Gineytisning uzoq burchakka yo‘llagan zarbasi ideal ko‘rinish oldi. Paolo Vanoli bu mavsumda rossonerilar bilan o‘yinlarda 4 ochko to‘pladi va Serjiu Konseysau jamoasi yevrokuboklar oltiligiga kirishi uchun aynan shuncha ochko yetishmayapti.
Birinchi o‘ringa ko‘tarilib olish imkoniyatiga ega bo‘lgan va to‘pga egalik qilish bo‘yicha yaqqol ustunlikka erishgan «Inter ancha vaqtgacha «Jyenoa» mudofaasini buzib o‘tolmadi. Shu bilan birga, «grifonlar» tanaffusdan keyin qarshi hujumda hisobni ochishga yaqin kelishdi, ammo vaziyatni himoyachi Acherbining qaltis podkati qutqarib qoldi. Faxriy himoyachi barmog‘ini sindirib olgani tufayli operatsiya qilingan Zommerni almashtirgan Xosep Martinesning joniga ora kirdi.
Keyinroq ilgari «Jyenoa»da o‘ynagan ispaniyalik posbon ham yaqin masofadan yo‘llangan zarbani to‘sib, o‘zini ko‘rsatishiga to‘g‘ri keldi, ammo shundan keyin mehmonlar boshqa xavfli vaziyatlar yaratishmadi. Simone Indzagi tanaffusda Korrea o‘rniga Torimiyni tushirganidan so‘ng, neradzurrilar bosimi tezlik oshishiga mutanosib ravishda o‘sib bordi. «Grifonlar» bir vaziyatda to‘pni darvoza chizig‘i ustida to‘xtatishdi, Leali Lautaro Martines ijrosidagi zarbadan keyin qahramonlik ko‘rsatdi, Barellaning zarbasidan keyin to‘p ustun va to‘sin tutashgan joyga bordi — hadeganda mezbonlarning omadi kelavermadi. Keyin esa Hoqon Chalxono‘g‘li o‘yinga qo‘shildi va uning burchak zarbasi Lautaroning goliga olib keldi.
Shundan so‘ng noyabr oyidan buyon Patrik Viyeyra murabbiylik qilayotgan «Jyenoa» yana hujumga o‘tdi. Jamoa ayrim vaziyatlarda javob goliga juda yaqin edi, shu bilan birga Torimiyda ham yaqqol golli vaziyat yuzaga keldi, ammo eronlik hujumchining yaqin masofadan zarbasi darvozabonning o‘ziga bordi. Lautaroda ham hisobdagi farqni oshirish uchun imkoniyatlar bo‘ldi, yakunda esa hisob o‘zgarmay qoldi. Argentinalik hujumchi esa «Inter» safida qatorasiga oltinchi mavsumda kamida 10 ta gol urayotgan ilk legionerga aylandi. Birinchi o‘ringa chiqib olgan milanliklar endi yakshanba kuni «Napoli» ochko yo‘qotishini kutadi.
«Bayyer» debyutda «Holshtayn» himoyasini shunchaki yanchib tashladi, himoyachilarni masxara qilgan Adli esa maydon chizig‘idan darvozabon hududiga yumshoq pas berdi, bu yerda Shik hammadan ildamroq harakat qildi. Tanaffus arafasida esa Adlining o‘zi Virsning uzatmasidan keyin «Bayyer»ning hisobdagi ustunligini oshirdi. Bu Florian uchun chempionatdagi o‘ninchi golli uzatma bo‘ldi va u ketma-ket ikkinchi mavsumda bunday ko‘rsatkichga erishmoqda. «Kuchli beshlik»da bunday ishni faqat Saloh uddalagan, Xabi Alonso esa yana Bundesliganing rekordlar kitobini qayta yozmoqda. Ispaniyalik mutaxassis 28 ta safar o‘yinida mag‘lubiyat nimaligini bilmayapti va o‘tgan asrning 80-90-yillari oralig‘ida «Bavariya» va «Kyoln» boshqaruvida qo‘rqinchli mehmon vazifasini bajargan Udo Lattekning natijasini ortda qoldirdi.
YeChLda birinchi o‘yindayoq masalani hal qilib 1/8 finalga yo‘l olgan «Borussiya» «Sporting» bilan javob o‘yinida urilmay qolgan gollarini «Union» darvozasiga urdi va bundesligadagi vaziyatni asta-sekin o‘nglab bormoqda. Birinchi bo‘lim o‘rtalarida berlinliklar himoyachisi Diogu Leyte Ryuersonning zarbasidan keyin to‘pni to‘sishga urinib, avtogol muallifiga aylandi. Keyin esa mehmonlar darvozabon hududida turgan Girassi Grossining uzatmasini golga aylantirishiga qarshilik qila olmadi. Ikkinchi bo‘limda esa «Union» mudofaasi butkul parokandalikka uchradi. Mehmonlarga rahmi kelgan hakam asosiy vaqtga bir soniya ham qo‘shmasdan final hushtagini chaldi - shu kuni Gross to‘rtta golli uzatma amalga oshirdi. Girassining hisobida ham shuncha gol. Gvineyalik futbolchi faoliyatidagi ilk pokerini amalga oshirib, Dortmundga Obameyang va Holandning xuddi shunday benefisi haqida eslatib qo‘ydi. «Signal Iduna Park»da ajoyib hafta, faqat yevrokubok zonasigacha hali ancha bor.
