Qoʻshimcha funksionallar
-
Tungi ko‘rinish
100 kmga 3,9 litr benzin sarflaydi: Renault Clio hetchbekining yangilangan avlodini taqdim etdi
Fransuz brendining eng ommabop modellaridan biri bo‘lgan Clio’ning yangilangan oltinchi avlodi Myunxendagi avtoko‘rgazmada namoyish etildi.
Mashinaning o‘lchamlari shunday: uzunligi 4116 mm, eni 1768 mm, balandligi 1451 mm. G‘ildiraklar bazasi 2591 mm. 5 kishiga mo‘ljallangan hetchbekning yukxona sig‘imi esa 391 litrga teng.
Saloni Renault 5 elektromobilini eslatib yuboradi: 2 ta katta displey, fizik tugmachalar, oldinda 2 ta USB-C porti, simsiz quvvatlash bo‘lmasi.
Mashina E-Tech hibrid tizimi asosida harakatlanadi. Buning uchun 1,8 litrli atmosfera bosimi ostida ishlaydigan benzinli dvigatel va ikkita elektromotor yordam beradi. Mashina 100 km tezlikka 8,3 soniyada chiqadi. Hibrid rejimda 1000 km masofa bosib o‘ta oladi. 100 kmga yonilg‘i sarfi esa 3,9 litrni tashkil qiladi.
Shuningdek, Clio’ning 1,2 litrli turbodvigatelli (115 ot kuchi) versiyasi ham bor. Bu Clio 100 km tezlikka 10,1 soniyada chiqa oladi.
Hozircha mashinaning narxi va sotuvga chiqish sanasi ma’lum emas.
