Abu-Dabida Ukraina, Rossiya va AQSh o‘rtasidagi muzokaralar yakunlandi

4-5 fevral kunlari Birlashgan Arab Amirliklarining Abu-Dabi shahrida Rossiya, Ukraina va AQSh delegatsiyalari ishtirokida uch tomonlama muzokaralarning ikkinchi bosqichi bo‘lib o‘tdi.

Uch davlat delegatsiyalari yopiq formatda uchrashdi. BAAda AQSh tomonidan AQSh prezidentining maxsus vakili Stiven Uitkoff, Donald Trampning kuyovi Jared Kushner va AQSh armiyasi vaziri Deniyel Driskoll ishtirok etdi. Ukraina delegatsiyasiga MXMK kotibi Rustem Umerov rahbarlik qildi. Rossiya tomonidan esa delegatsiyaga RF qurolli kuchlari bosh shtabi bosh boshqarmasi rahbari, admiral Igor Kostyukov boshchilik qildi.

Quyida ushbu muzokaralar yakunlari bo‘yicha tomonlar bergan bayonotlarning qisqacha mazmuni keltiriladi.

AQSh
Prezidentning maxsus vakili Stiv Uitkoff

Delegatsiyalar ochiq qolayotgan masalalarni muhokam qildi. Ular orasida – otashkesim va harbiy harakatlar to‘xtatilishini monitoring qilishga imkon beruvchi metodlar ham bor. Mustahkam tinchlik uchun shart-sharoit yaratish haqida gaplashildi. Muzokaralar yaqin haftalarda davom ettiriladi. Rossiya va Ukraina besh oy ichidagi ilk harbiy asirlar almashuvini o‘tkazish bo‘yicha kelishib oldi – 157 ga 157 formatida. AQSh Rossiya harbiylari bilan uzilib qolgan yuqori darajadagi aloqalarni tiklashga kelishib oldi.

Ukraina
Prezident Volodimir Zelenskiy

Ukraina muzokarachilar guruhi ikki kun davomida AQSh va Rossiya bilan muzokaralar olib bordi. To‘liq hisobotni kutyapman, telefonda ko‘p narsani muhokama qilib bo‘lmaydi. Yaqin kunlarda navbatdagi uchrashuvlar rejalashtirilgan – bu Amerikada bo‘lib o‘tishi mumkin. Biz chinakam tinchlikka yaqinlashtiradigan va uni ishonchli, uzoq muddatli qiladigan hamda Rossiyada urushni davom ettirishga rag‘bat qoldirmaydigan barcha formatlarga tayyormiz. Muhimi, urush shunday tugashi kerakki, Rossiya tajovuzi uchun taqdirlanmasin. Bu haqiqiy xavfsizlikni ta’minlovchi asosiy tamoyildir.

Rossiya (rasmiy)
RF prezidenti maxsus vakili Kirill Dmitriyev

Yevropadagi, Buyuk Britaniyadagi urush qo‘zg‘atuvchilar doimo muzokaralar jarayoniga xalaqit berishga, unga suqilib kirishga harakat qilishadi. Bunday urinishlar qanchalik ko‘p bo‘lsa, biz shunchalik ko‘p taraqqiyot borligini va yaxshi, ijobiy harakat davom etayotganini ko‘ramiz. Iqtisodiy yo‘nalishda Rossiya va AQSh o‘rtasidagi munosabatlarni tiklash bo‘yicha faol ishlar olib borilmoqda.

Rossiya (norasmiy)
TASS davlat agentligi va uning manbalari

Iqtisodiy jihatlar, hududiy masala, o‘t ochishni to‘xtatish mexanizmi muhokama qilindi. Barcha davlatlar Donbassni Rossiyaniki deb e’lon qilishi kerak – Rossiya bunga asosiy kelishuvning bir qismi deb qaraydi. Tinchlikparvar kuchlar bo‘lishi hammani ham qoniqtirmaydi, shundan kelib chiqib, Ukraina uchun xavfsizlik kafolati – ko‘p millatli kuchlarning tezkor reaksiyasi bo‘lishi mumkin. Yevropa bir necha bor qo‘shilishga harakat qildi – bugun ular muzokaralar stolida yo‘q.