2026-yil 1-oktabrdan Qozogʻistonning «Passajirskiye perevozki» kompaniyasi Almati - Toshkent yoʻnalishi boʻyicha harakatlanadigan xalqaro poyezd tarkibida birinchi marta «Ayollar vagoni»ni joriy etadi. Poyezd Qozogʻiston va Oʻzbekiston oʻrtasida muntazam temir yoʻl qatnovini taʼminlaydi, deb xabar berdi Kazinform.
«Almati-Toshkent xalqaro yoʻnalishi Qozogʻiston va Oʻzbekiston oʻrtasida yoʻlovchi tashish aloqalarini rivojlantirishda muhim ahamiyatga ega. Ushbu yoʻnalishga talab yuqoriligi va yoʻlovchilar oqimi ortib borayotganini hisobga olgan holda, mazkur yoʻnalishda «Ayollar vagoni»ni ishga tushirishga qaror qilindi. Ushbu xizmat ichki temiryoʻl yoʻnalishlarida ham yuqori talabga ega. Xizmat joriy etilganidan buyon «Ayollar vagoni»dan 946 mingdan ortiq yoʻlovchi foydalandi», - dedi kompaniya boshqaruv raisi Anvar Axmetjanov.
«Ayollar vagoni»da kattalar hamrohligida yetti yoshgacha boʻlgan oʻgʻil bolalarning safar qilishiga ham ruxsat beriladi. Bunday vagonlarga chiptalar faqat ayollarga sotiladi, ularga esa faqat ayol provodniklar xizmat koʻrsatadi.
«Chiptalarni temir yoʻl kassalaridan kassirga «Ayollar vagoni»ni tanlayotganingizni bildirgan holda, shuningdek, rasmiy sayt orqali onlayn xarid qilish mumkin. Chipta rasmiylashtirilayotganda «JN» belgisiga eʼtibor berish kerak. Ushbu belgi joyning ayollar vagoniga tegishli ekanini koʻrsatadi», - deyiladi xabarda.
Qayd etilishicha, chiptalar savdosi poyezd joʻnab ketishidan 45 kun oldin ochiladi. Bu yoʻlovchilarga safarni oldindan rejalashtirish imkonini beradi.
Qozogʻistonda ayollar uchun maxsus vagonlar ilk bor 2021-yil 10-oktabrda yoʻlga qoʻyildi, tajriba muvaffaqiyatli deb topilgach, 2022-yildan boshlab vagonlar soni oshirildi. «Qozogʻiston temir yoʻllari» kompaniyasi maʼlumotlariga koʻra, vagonlar birinchi navbatda safar vaqtida ayollarning xavfsizligini taʼminlash va qulayligini oshirish maqsadida joriy etilgan. Bu qaror, shuningdek, poyezdlardagi jinsiy zoʻravonlik holatlaridan soʻng yuzaga kelgan ijtimoiy rezonans bilan ham bogʻliq.
