Markaziy bank boshqaruvining “Markaziy bankning banklararo toʻlov tizimi orqali elektron toʻlovlarni amalga oshirish tartibi toʻgʻrisidagi nizomga oʻzgartirishlar kiritish haqida”gi qarori qabul qilindi.
Hujjat 2026-yil 28-avgustda davlat roʻyxatidan oʻtkazilib, 29-avgustdan kuchga kirdi.
Qaror bilan banklararo elektron toʻlovlarni amalga oshirish tartibiga bir qator oʻzgartirishlar kiritildi.
Xususan, Tezkor toʻlovlar tizimi orqali toʻlovlarni amalga oshirishga oid norma yangi tahrirda bayon etildi.
Unga koʻra, toʻlovlarni amalga oshirish maqsadida mijozlarning farmoyishlari asosida yaratilib, Tezkor toʻlovlar tizimiga qayta ishlash uchun uzatiladigan toʻlov hujjatlari bank mijozlari tomonidan masofaviy xizmat koʻrsatish tizimlari orqali 24/7 rejimida xizmat koʻrsatuvchi bankka taqdim etilgan boʻlishi lozim.
Bunda toʻlovchining hisobvaragʻida operatsiyani amalga oshirish uchun yetarli mablagʻ boʻlishi talab etiladi.
Shuningdek, nizomdagi bank faoliyatini amalga oshirish uchun litsenziyaga oid ayrim atamalar ham amaldagi qonunchilikka muvofiqlashtirildi.
