Shu yil 9-sentabrdan boshlab Xiva va Buxoro oʻrtasida yangi elektropoyezd qatnovi yoʻlga qoʻyiladi, deb xabar berdi «Oʻztemiryoʻlyoʻlovchi» AJ.
Qayd qilinishicha, qatnov tezyurar CRRC-Daliyan yoʻlovchi elektropoyezdida amalga oshiriladi. Uning tarkibi 5 ta vagondan iborat boʻlib, jami 415 ta ekonom-klass oʻrindigʻi mavjud.
707-sonli «Xiva - Buxoro-1» elektropoyezdi seshanbadan tashqari haftaning barcha kunlari harakatlanadi. Poyezd Xivadan soat 9:55 da yoʻlga chiqib, Buxoroga soat 14:32 da yetib boradi.
706-sonli «Buxoro-1 - Xiva» elektropoyezdi dushanbadan tashqari haftaning barcha kunlari harakatlanadi. Poyezd Buxorodan soat 15:45 da yoʻlga chiqib, Xivaga soat 20:25 da yetib boradi.
14-sentabrdan boshlab, 701-sonli «Buxoro-1 - Toshkent» elektropoyezdi har dushanba kuni qatnaydi. (Soat 15:17 da yoʻlga chiqib, soat 21:22 da manzilga yetib boradi).
15-sentabrdan boshlab, 702-sonli «Toshkent - Buxoro-1» elektropoyezdi har seshanba kuni qatnaydi. (Soat 10:05 da yoʻlga chiqib, soat 15:17 da manzilga yetib boradi).
Yangi elektropoyezdlar qatnovi yoʻlga qoʻyilishi munosabati bilan quyidagi yoʻlovchi poyezdlarining harakat jadvaliga ham oʻzgartirishlar kiritiladi:
- 56-son Toshkent Janubiy - Xiva - 8-sentabrdan;
- 58-son Toshkent Janubiy - Shovot - 10-sentabrdan;
- 127/128-son Andijon - Qoʻngʻirot - 8-sentabrdan;
- 301-son Dushanbe - Toshkent - 15-sentabrdan;
- 6412-son Toshkent Janubiy - Xovos - 15-sentabrdan, har seshanba kuni;
- 6353-son Urganch - Nukus - 9-sentabrdan.
