DW’ning FT’ga tayanib yozishicha, AQSH maʼmuriyati vakillari Ukraina va Yevropa rasmiylariga qoʻngʻiroq qilib, Vashington talabini yetkazmoqda.
«Ular Kiyevga qoʻngʻiroq qilyapti… ular hammaga qoʻngʻiroq qilyapti», - degan AQSH Mudofaa vazirligi vakilidan shunday qoʻngʻiroq olgan amaldorlardan biri. U Yevropadagi rasmiylarni nazarda tutgan.
FT maʼlumotiga koʻra, amerikalik rasmiylar bogʻlangan shaxslar orasida Ukraina prezidentining harbiy maslahatchisi, 93-alohida mexanizatsiyalashgan brigada sobiq qoʻmondoni Pavel Palisa ham bor.
PURL - «Ukrainaning ustuvor ehtiyojlari roʻyxati» dasturi boʻlib, Kiyevni qurol bilan taʼminlashga qaratilgan. Xabarda dastur allaqachon toʻxtatilgani emas, uni bloklash tahdidi orqali bosim oʻtkazilayotgani aytilmoqda.
Bu maʼlumotlar Trampning «energetika boʻyicha sulh» haqidagi bayonoti ortidan tarqaldi. AQSH prezidenti 11-oktabr kuni Rossiya va Ukraina energetika obyektlariga zarbalarni toʻxtatishga rozi boʻlganini eʼlon qilgan.
«Shu paytdan boshlab Rossiya va Ukraina oʻrtasidagi urushda energetika boʻyicha sulh joriy etiladi. Har ikki tomon bunga rozilik berdi. Uni buzmang!» - deb yozgan Tramp Truth Social’da.
Ukraina prezidenti Volodimir Zelenskiy esa dastlab Axios jurnalistiga bunday qisman sulhga erishilganidan xabari yoʻqligini aytgan. Biroq Rossiya rozi boʻlsa, tashabbusni qoʻllab-quvvatlashini bildirgan.
Keyinroq Zelenskiy Ukraina AQSH tomonidan tafsilotlarni kutayotganini maʼlum qilgan.
«Ukraina Qurolli kuchlari barcha buyruqlarni oldi. Hamkorlarimizning bizga yordam berishi mumkin boʻlgan barcha qadamlarini qoʻllab-quvvatlaymiz. Amerikaning Rossiya bilan muloqotiga oid aniq tafsilotlarni va Putin prezident Tramp aytgan gaplarni bajarishini kutyapmiz», - degan u.
Ayni paytda Zelenskiyga yaqin yuqori martabali ukrainalik amaldor FT’ga sulh haqida «hech kim eshitmaganini» bildirgan. Shu bois Tramp eʼlon qilgan kelishuvning aniq shartlari va uni amalga oshirish tartibi yuzasidan savollar ochiq qolmoqda.
FT, shuningdek, Zelenskiy Ukrainada saylov oʻtkazish imkonini yaratish uchun 60 kunlik toʻliq oʻt ochishni toʻxtatishga erishishni taklif qilganini yozgan. Oq uy Tramp Putinni bunga koʻndirish taklifiga qanday munosabatda ekani haqidagi savolga javob bermagan.
