Osiyo taraqqiyot banki Oʻzbekistonda elektr energiyasini taqsimlash tizimini modernizatsiya qilish uchun 200 mln dollar qarz ajratadi. Bu haqda bank matbuot xizmati xabar berdi.
Qarz bitimi 15-oktabr kuni Tailandning Bangkok shahrida OTB prezidenti Masato Kanda va Oʻzbekiston bosh vaziri oʻrinbosari - iqtisodiyot va moliya vaziri Jamshid Qoʻchqorov tomonidan imzolandi.
Dastur doirasida mamlakat boʻylab muhim ahamiyatga ega 60 ta elektr taqsimlash podstansiyasi rekonstruksiya va modernizatsiya qilinadi. Tarmoqlarni boshqarishni takomillashtirish uchun raqamli tizimlar ham joriy etiladi.
OTB maʼlumotiga koʻra, Oʻzbekistonda iqtisodiyotning oʻsishi, shaharlarning kengayishi va aholining elektr energiyasiga ehtiyoji ortishi tarmoqlarga tushadigan yuklamani koʻpaytirmoqda. Eskirgan infratuzilma, elektr energiyasi yoʻqotishlari va uskunalarning ortiqcha yuklanishi elektr taʼminoti ishonchliligiga taʼsir koʻrsatmoqda. Bu holat, shuningdek, qayta tiklanuvchi energiya manbalarining yangi quvvatlarini tarmoqqa ulashni qiyinlashtirmoqda.
Dastur natijasida elektr energiyasi yoʻqotishlarini kamaytirish, transformatorlarga tushadigan ortiqcha yuklamani pasaytirish va elektr taʼminoti barqarorligini oshirish kutilmoqda. Shuningdek, kamida 3,3 GVt quvvatga ega qayta tiklanuvchi energiya manbalarini elektr tarmogʻiga ulash uchun sharoit yaratiladi. Issiqxona gazlari chiqindilarini esa yiliga qariyb 23 ming tonna karbonat angidrid ekvivalentiga kamaytirish rejalashtirilgan.
Loyiha «Oʻzbekiston milliy elektr tarmoqlari» AJning tarmoqlardan foydalanish va ularni boshqarish salohiyatini oshirishga ham qaratilgan. Xodimlarning texnik koʻnikmalarini rivojlantirish, boshqaruv va moliyaviy nazorat tizimlarini mustahkamlash, malaka oshirish hamda energetika sohasida xotin-qizlar ishtirokini kengaytirish ham dasturning vazifalari qatoriga kiradi.
OTB maʼlumotiga koʻra, bu bankning Jahon banki bilan oʻzaro toʻliq ishonch mexanizmi doirasida amalga oshiriladigan energetika sohasidagi birinchi dasturidir. Shuningdek, u Oʻzbekiston energetika sohasida natijalarga asoslangan qarz asosida amalga oshiriladigan ilk dastur hisoblanadi.
Ushbu mexanizm OTB va Jahon bankiga bir-birining kompleks baholash natijalari hamda loyihalarni amalga oshirish tartiblaridan foydalanish imkonini beradi. Bu takroriy ishlarni va bitimlar bilan bogʻliq xarajatlarni kamaytirishga xizmat qiladi.
