Surxondaryo viloyati Sho‘rchi tumanida fermer xo‘jaligiga tegishli yerni 33 million so‘mga sotib yuborgan shaxsga jinoyat ishi qo‘zg‘atilgan. Bu haqda viloyat IIB axborot xizmati xabar bermoqda.
Ma’lum qilinishicha, 2021 yil 1 dekabr kuni Sho‘rchi tuman IIB Tergov bo‘linmasidan tushgan hujjatlarga ko‘ra, tumanning Savurtepa mahallasida yashovchi, I.Ikromning arizasiga asosan tergovga qadar surishtiruv o‘tkazilgan.
Surishtiruv davomida aniqlanishicha, Qumqo‘rg‘on tumani Gultepa mahallasida yashovchi, T.Toshmurod 2021 yil avgust oyida shu mahallada joylashgan fermer xo‘jaligiga qarashli 10 sotix yerni o‘ziga tegishli ekanligini aytib, kadastr hujjatlarini rasmiylashtirib berishini va’da qilgan.
So‘ng I.Ikromdan 33 million so‘m pullarni olib, bergan va’dasini bajarmasdan pullarni o‘z ehtiyojiga ishlatib yuborgan.
Qayd etilishicha, joriy yil 1 dekabr kuni T.Toshmurodga nisbatan Jinoyat kodeksining 168-moddasi 2-qismi bilan jinoyat ishi qo‘zg‘atilgan.
