Эльмира Боситхонова янги лавозимга тайинланди

Хотин-қизлар қўмитасининг эндиликда собиқ раиси Эльмира Боситхонова янги тузилган Маҳалла ва оилани қўллаб-қувватлаш вазирлигида вазирнинг биринчи ўринбосари лавозимига тайинланди, «Нуроний» жамғармаси раиси Содиқжон Турдиев ҳам янги вазирликда вазир ўринбосарига айланган.

Kun.uz манбаси хабар беришича, Эльмира Боситхонова янги ташкил этилган Маҳалла ва оилани қўллаб-қувватлаш вазирининг биринчи ўринбосари лавозимига тайинланди.

Элмира Боситхонова 1958 йилда туғилган, 1981 йилда Тошкент давлат тиббиёт институтининг «даволаш иши» йўналишини тамомлаган. 1981-2011 йилларда шифокор-интерн, анестезиолог-реаниматолог, бўлим бошлиғи, Тошкент шаҳар тез тиббий ёрдам клиник шифохонаси бош шифокори.

2011-2016 йилларда Бош вазир ўринбосари – Хотин-қизлар қўмитаси раиси лавозимида ишлаган, кейин Соғлиқни сақлаш вазири ўринбосари лавозимига ўтказилган Эльмира Боситхонова 2019 йилнинг ёзида яна ҳукумат аъзолигига қайтарилган, 2020 йилнинг январида лавозимга қайта тасдиқланганди.

Эслатиб ўтамиз, 18 февраль куни Ўзбекистон Президентининг «Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида»ги фармонига мувофиқ Бош вазир ўринбосари – Хотин-қизлар қўмитаси раиси лавозими тугатилди.

Худди шу фармон билан Маҳалла ва оилани қўллаб-қувватлаш вазирлиги тузилган.

18 февраль куни Қонунчилик палатаси депутатлари «Маҳалла» кенгаши раиси Раҳмат Маматовни Маҳалла ва оилани қўллаб-қувватлаш вазири лавозимига номзод сифатида маъқуллашганди.
19 февраль куни Ички ишлар вазири ўринбосари Азиз Икромов ўз лавозимини сақлаб қолган ҳолда вазир ўринбосари лавозимига тайинланган, шунингдек, «Маҳалла» кенгаши раиси ўринбосари лавозимида ишлаб келаётган Ботир Парпиев вазир ўринбосарларидан бирига айланган.

#тайинлов #Содиқжон Турдиев #Эльмира Боситхонова